Mawkyrwat, Naiwieng 14
Ka ophis jong u District Sports Officer, South West Khasi Hills District ha ryngkat ka jingïatreilang bad ka Ophis jong u Deputy Commissioner ka South West Khasi Hills District ha ka 13 tarik u Naiwieng 2025 ka la pynkut noh ïa ka lympung ïalehkai ki samla ka Chief Minister District Level Youth Engagement Program ba ar sngi kaba dei jong ka District Level kaba la sdang naduh ka 12 tarik u Naiwieng bad pynkut noh ha ka 13 tarik u Naiwieng, 2025 ha Multipurpose Hall jong ka DC’S ophis Laitlawsang, South West Khasi Hills District.
Ha ka sngi sdang kaba dei ka 12 tarik u Naiwieng, 2025 la wan ban plie pyrda da u Bah FB Basan , ADC, SWKHD kum u kongsan bad ha ka sngi pynkut kaba dei ha ka 13 tarik u Naiwieng, 2025 la wan ban pynhap pyrda da u Bah Renikton Lyngdoh Tongkhar, MLA ka Mawkyrwat Constituency, ha ryngkat ka jingdonlang naduh u Bah B. Mawlong, IAS, Deputy Commissioner, South West Khasi Hills District, ka N.D. Shira, MCS, Assistant Commissioner, South West Khasi Hills District , Bah D.Syngkon , District Sports Officer , SWKHD kynthup ïa kiwei de ki ophis bad kiba la shah khot sngewbha naduh ki nonghikai bad ki khynnah skul bad ki samla pule kiba la wan ban ïashimbynta ha ki jingïakob bapher bapher ha kitei ki ar sngi.
La wan ban ïashim bynta ha kane ka lympung jong ki samla da ki skul bad ki shnong bapher-bapher jong ka Mawkyrwat bad Ranikor Block kumjuh ruh ki riew shimet.
Ha kine ki ar sngi, ki program ba la pynlong ki kynthup ïa ka jingïatai halor ka ‘Life Skills/Career Guidance/Communication Skills, ka jingïakop tem guitar, ka jingïakop thohkhana, ka jingïakop thoh poitri, ka Declamation, ka One Act Play, ka jingïakop tan tyllai, ka jingïakop rwai ne Folk Song, ka Science Mela, jingïakop dro dur, ka jingïakop shad ne Folk Dance, ka jingïakop kyntip bad kiwei de.
Ka jingthmu ban pynlong ïa kane ka prokram ka long shibynta ba ki khynnah bad ki samla kin lah ban pyni ïa ki sap ki phong ba ki don ha ki rynsan la ka long naduh ki Block Level, ki District Level bad ki State ne National Level.
Ha kaba kut jong ka program la ïoh ruh ban sam ïa ka khusnam ryngkat ki syrnod sha baroh ki nongjop kiba la pyni ïa ki sap ha ki jingïalehkai bapher bapher.
