Patna, Naiwieng 14 (UNI)
Ka National Democratic Alliance (NDA) ka la wanphai biang sha ka bor synshar da ka jingjop donburom, ha kaba ka la tam haduh palat 200 ngut ki nongmihkhmat da kaba pynrem kput ïa ka kynhun ka Liang Pyrshah jong ka Grand Alliance ha ka ilekshon sha ka ïingdorbar thawaiñ jong ka Bihar.
Ka Congress-RJD-Left Grand Alliance ka la hap ban mad ïa ka jingshah rem, bad i-kumba ka la poi sha ka jingkheiñ kaba duna bha, kaba long tang kumba 40 ngut ki nongmihkhmat haba ïanujor bad ki 110 ngut kiba ka la jop ha ka ilekshon sha ka ïingdorbar thawaiñ jong u snem 2020.
Ha ka ïingdorbar jong ka Bihar kaba don 243 ngut ki nongmihkhmat, ka Bharatiya Janata Party (BJP) kaba don hakhmat eh jong ka National Democratic Alliance ka la jop na kumba 90 tylli ki konstitwensi, namarba ka la ïoh jingjop ha 79 tylli ki konstitwensi, nalor kiwei pat ki kyrtong (jong ka) kiba la tam hakhmat ha 10 tylli kiwei pat ki konstitwensi ha ka por 8:30 baje mynmiet, katkum ka Election Commission. Ka BJP ka la jop ha 75 tylli ki konstitwensi ha ka ilekshon ba la dep.
Kawei pat ka paralok ba kongsan jong ka NDA ha ka Jylla, ka Janata Dal (United) jong u Myntri Rangbah ka Jylla, u Nitish Kumar ka la jop ha ki 67 tylli ki konstitwensi, nalor kiwei pat ki kyrtong (jong ka) kiba la tam hakhmat ha ki 18 tylli kiwei pat ki konstitwensi, bad ka lah ban poi sha ka 85 tylli lada ka jinglong-jingman ba mynta ka neh, ha kaba ka lah ban kiew ar shah haba phai sha ka jingkheiñ kaba long 43 ha u snem 2020.
Napdeng kiwei pat ki paralok jong ka NDA, ka Lok Jan Shakti (Ram Vilas) jong u Chirag Paswan ruh ka la leh bha bad ka lah ban jop ha 19 tylli ki konstitwensi (16 tylli ki jingjop ryngkat lai tylli kiba dang tam), ka Hindusthan Awam Morcha (Secular) ka la ïoh 5, katba ka Rashtriya Lok Morcha i-kumba ka don ha ka lynti ban jop ha 4 tylli ki konstitwensi (3 kiba la jop lypa bad 1 kaba dang tam hakhmat).
Ka GA, ka bym shym la leh bha ha kane ka kynti, ka la sakhi ba ka Rashtriya Janata Dal, ka la jop na kumba 25 tylli ki konstitwensi (20 tylli kiba la jop bad 5 kiba dang tam), katba ka Congress, ka lah ban ïoh tang 6. Ha ka ilekshon 2020, ka RJD ka la ïoh 53 katba ka Congress ka la ïoh 19 ngut ki nongmihkhmat.
Napdeng kiwei pat ki paralok jong ka GA, ka CPI-ML (Liberation) ka la jop na ar tylli ki konstitwensi, bad ka CPI-M ka la ïoh tang kawei.
Na kiwei pat ki seng, ka AIMIM ka la ïoh 5, katba ka India Inclusive Party bad ka Bahujan Samaj Party ki la lamkhmat na mar kawei ka konstitwensi.
Haba kren ha New Delhi hadien ba ki jinglong-jingman ki la paw shai, u Myntri Rangbahduh ka ri, u Narendra Modi u la pynpaw, “Ka ‘Jungle Raj’ mynta kan ym wanphai shuh sha Bihar” katba ki dkhot ka seng jong u ki la lehkmen ha Patna bad Delhi.
Katba u Nitish Kumar u lah ban long kum u Myntri Rangbah watla ka seng jong u ka ïoh kham duna ban ïa ka BJP, hynrei ki jingïakynad hapdeng kine ki ar tylli ki paralok ki lah ban nang jur naba ka BJP ka la long kum ka paralok ba kham rangbah.
Ka Jan Suraj Party (JSP) kaba la thaw da u Prashant Kishor, uba tbit bha ha ka kam saiñ pyrthei kam shym la ïoh wat tang uwei ruh u nongmihkhmat.
