Shillong, Naiwieng 14:
Ki nongrwai ba Pawnam naduh ka Nora Fatehi , The Script bad Jason Derulo ki la pynshongshit ïa ki paidbah ha madan JN Stadium Polo, Shillong ha sngi sdang ka tamasa Cherry Blossom ka ban kut lashai ka sngi.
Katkum ka jingkheiñ antad, ki paidbah kiba wan poi ki long palat 50 hajar ngut bad kiba bun ki dei nabar Jylla.
Ka Nora ka la sdang nyngkong ban rwai ha por 8:00 baje janmiet, bud sa ka The Script bad naduh 10:30 la sdang rwai sa u Jason.
Ha ka por janmiet la ïohi ba ki riew paidbah ki bym lah kot bor ban thied tiket namar ba la rèm palat ki la ïeng ha tynrai dieng kaba don ha jrong ka surok bah ba wan na Golflink sha Polo ban peit ïa kiba rwai bad shad ha Cherry Blossom ha madan Third Ground.
Kumjuh ruh ki paidbah kiba ïoh thied tiket ki la sdang tuid ban rung sha madan Polo naduh 6 baje janmiet namar ki nongrwai ba Pawnam kin rwai ha JN Stadium.Kumban shu pynkynmaw kiba ap pahara ne ki ‘security’ hakhmat ka Jawaharhal Nehru Stadium Polo ki la ïathuh ba kiba wan sha ka tamasa Cherry Blossom 2025 ki bun kidei kiba nabar Jylla naduh Delhi.
Ka jingtip ba bun kiba nabar Jylla kiba wan ka dei nanar la shah ban rung ïa ki paidbah ha Madan Polo naduh 2:00 baje nohphai sngi.
Ha kane ka Cherry Blossom la pynkhreh ar tylli ki jaka rwai kawei ka madan Third Ground na bynta kiba na Meghalaya bad ha JN stadium la shna ïa ki nongrwai nabar ri. Ki tiket kiba rit duh ka dei kaba 3 hajar tyngka bad kaba heh duh kaba 9 hajar tyngka duna.
Ki nongrwai ki ban pynsngewtynnad ïa ki paidbah ha ka sngi sdang ki long ka The script, Nora Fatehi, Jason Derulo.
Katba ha ka sngi khatduh kaba dei sngi saitjaiñ ki ban rwai ki long Diplo, Tyga bad Aqua.
