Shillong, Naiwieng 14
Ka All Meghalaya Karate-Do Association ka sngew sarong ban pynbna ba ka Larisha Kurbah ka la shah khot sha ka Senior National Coaching Camp ka ban long ha Sports Authority of India’s Lucknow Centre.
Ka Larisha ka la ïoh bun tylli ki takma ha ki lympung ïalehkai jong ki Jylla bad ka la wanrah burom ruh ïa ka Jylla Meghalaya ha ki jingïalehkai jong ka ri, kum ka ksiar ha ka India Open International Karate Championship 2023 ha New Delhi, ka takma rupa ha ka SEIKOKAI All India Karate Championship 2024 ha New Delhi bad ka takma rupa ha ka DEO HAH All India Karate Championship ha Guwahati ha u snem 2024. Kaba dang shen ka la ïoh ban khur ïaka rnong ha ka jingïakop ïalehkai Senior National Championship 2025 kaba la long ha Hyderabad.
Kane ka camp ha Lucknow kan long naduh ka 17 tarik u Naiwieng haduh ka 31 tarik u Nohprah. Ka Larisha kaba dang 19 snem ka rta ka don ha ka jingïalehkai ‘kumite’ marwei jong ki kynthei ha ka kyrdan jingkhia kaba 61 kg.
