Shillong, Naiwieng 16
Ki arngut ki rangïalehkai (guest professionals) ka jylla ba kynthup ïa u Rahul Dalal bad Ajay Duhan, ki la lah ban kamai ïa ki spah ron (century), ha ka sngi sdang jong ka Ranji Trophy 2025-26 pyrshah ïa ka Manipur ha ka sngi U Blei ha madan jong ka CK Pithawala, Surat.
Ha kane ka jingïakhun u Rahul u la lah ban kamai haduh 151 ron na ki 146 bol ba kynthup 23 tylli ki ‘four’ bad 3 tylli ki ‘six’, katba u Ajay u la dem hi khui ban kamai 102 ron ba la wan na ki 184 bol ba la bynrap lang bad ki 13 tylli ki ‘four’.
Kane ka jinglah ban ïalehkai bha kine ki arngut ki nongtied (batsman) ka la wan hadien ba ka Meghalaya hadien ba ka la jop ïa ka kynting pisa, ka la kam trai ban tied nyngkong ha kaba ka la kamai 359 ron na ki 90 over.
Kiwei pat ki nongtied ka Meghalaya kiba la lah ban noh synñiang ki long u Arien Bonchang Sangma uba la tied 31 run na ki 56 bol bad u Arpit Bhatewara (33 na ki 64), kiba la wan ruh ban plie ïa ka pali jong ka kynhun bad baroh arngut kin seng ïa ka nongrim kamai ron kaba 61.
Hadien kane u Arien u la shah pynkhyllem noh ha kaba la bud pat sa u Arpit bad bynrap pat sa na u Kishan Lyngdoh (6 ron), kaba la pynlong shipor ïa ka Meghalaya ba kan hap lai wiket na ka bynta 74 ron.
Hadien kane, u Rahul bad u Ajay, ki la theh umpjah noh ïa ka mynsiem ba la rhem ka Manipur, hadien ba kine baroh arngut ki la dem ïakhun hi triang bad sei madan ïa ka jingkamai ron paralok kaba 247 ron na ka bynta ka wiket kaba saw.
Hadien kane, baroh arngut ki la shah pynkhylle noh ha u Johnson Sing (2/21 na ki 5 overs) bad haduh ba kut jong ka sngi, ki arngut ki nongtied kiba dangneh hapdeng ka madan ki long u Swastic Chettri (14 ron) bad u Kusha Agarwal (18 ron).
