Shillong, Naiwieng 16
U Bah Lahkmen Rymbui, Myntri ba dei peit ïa ka tnad Information & Public Relation ha ka jingrakhe ïa ka ‘National Press Day’ lane ka sngi kyrpang jong ki nongthoh khubor ha ka sngi Saitjaiñ u la ong ba ka dei kaba hap banjur ïa ka kamram ba kongsan ban pathai ïa ki khubor kiba shisha, ha kane ka juk Digital kaba mynta.
Haba ai jingkren ha ka jingïalang halor ka phang “Role of Print Media in the Digital Age,” u Bah Rymbui ula pynpawba ki nongshong shnong ki mat jingeh ha ka ban pynïapher ïa ka jingshisha ha ka jingpathai khubor lyngba ki kot khubor bad ki lad pathai khubor ba ha ki rynsan ‘Social media’.
U Bah Rymbui u la ong ba dang shen ha ka jingïalang jong ka ‘Meghalaya Media Meet’, u Myntri Rangbah ka Jylla u Conrad K Sangma u la ai jingkren shaphang ka jingïatreilang jong ki Press bad ki Media kiba la tip kum ki païa ba 4 ha ka ri synshar paidbah (fourth pillar of democracy), ka jingpynmih ïa ki khubor kiba shisha, ka jingshaniah ki paidbah, ka jingpyndonkam da ka jingkitkhlieh ïa ki kor teknoloji bad ka jingdon ïa ka jingkitkhlieh.
Nalor kata u Bah Rymbui ula pynpaw ruh ba ka Sorkar ka bat skhem ïa ki jingkular halor kitei ki païa bad ong ba ka jingpynmih ïa ki khubor kiba shisha, ka dei ka bynta jong ka jingshakri, kaba kiar na ka jingisih, jingïa-phiah bad ka jingniew beiñ, haba ïada ïa ka jingleh kaba shimet, ïa ka burom jong ki khynnah bad kiwei pat ki kynhun kiba shah ktah.
U la kdew ruh ha kaba ïadei ka Jylla Meghalaya, ban burom ïa ka kolshor tynrai, ka ktien bad ïa ka jingsngew jongki shnong ki thaw, ka dei kaba kongsan ha ba pathai ïa ki khubor ryngkat bad ki paidbah, ym tang na ka bynta ka jongki.
Ha ba ïadei ka jingpyndonkam ïa ki kor teknoloji ka juk mynta, u Bah Rymbui u la kyntu ba dei ban bhah tyngka ban thied ïa ki tiar Digital, Data Literacy, ka jingkhmih bniah ïa ki jingshisha da ka AI bad ki bynta kiba kongsan ha ki ktien tynrai ban pynthikna ba ka jingshisha kan long ha khmat eh ban ïa ka jingai ïa ki jingtip kiba ïalam bakla ïa kiba pule.
Shuh-shuh u la ban jur ba donkam ban don ka jingkitkhlieh bad ka jingïatreilang, ïa ka jingpynmih ïa kiei-kiei kiba bha bad u la kyntu ruh ïa ki nongthoh khubor ba kin kylli ïa ki jingeh, ban tohkit ïa ki jingpynslem bad ban pynshisha ïa ki jingkular, ki la urlong ne em kumba la kular.
U Bah Rymbui u la kyntu ïa ki nongpathai khubor ban pyntip ïa ki paidbah bad ban pynrung ruh ha ki ïa ka jingmlien ban pule hapdeng ki khynnah bad kane kan pynkhlaiñ ïa ka jinglong jingman jong ka synshar paidbah ha ka Jylla.
