Washington, Naiwieng:
Ka jingmynjur ïa ka rukom pynïaid jong u President Donald Trump ïa ka sorkar ka la hiar bha naduh ba sdang jong ka samoi treikam ba ar jong u, katkum ka jingwad bniah ba thymmai jong ka AP-NORC, ha kaba bun na ka jingbym sngewhun kaba la nang jur ha kine ki sngi, ka mih na ki para dkhot jong ka seng Republican hi.
Ia kane ka jingwad bniah na ka The Associated Press-NORC Centre for Public Affairs Research, la pynlong hadien ka jingjop jong ki Democrats dang shen ha ki ilekshon ba la dep hynrei shwa ba ka Congress kan shim ia ki sienjam kiba kongsan ban pyrshang ban pynkut noh ia ka jingkhang khyrdep kaba slem tam ha ka histori jong ka U.S. Ka pyni ba tang 33% na ki rangbah U.S. ki mynjur ia ka rukom pyniaid jong u President ka Republican ia ka sorkar, kaba hiar na ka 43% ha ka jingwad bniah jong ka AP-NORC ba la dep pynmih kaiphod ha u bnai u Lber.
Kata ka la long kaba la pynlong ha ka bynta kaba khraw da ka jinghiar ka jingmynjur hapdeng ki Republican bad ki riew shimet. Katkum ka jingwad bniah, tang kumba ar bynta na ka lai bynta jong ki Republican, 68%, ki la ong ba ki mynjur ïa ka rukom pynïaid jong ka sorkar Trump, kaba hiar na ka 81% ha u bnai Risaw. Ka jingmynjur jong ki riew shimet ka la hiar na ka 38% sha ka 25%.
Kane ka kaiphod, ka pynpaw ïa ki jingma kiba mih na ka jingkhang dam, kaba u Trump bad ka sorkar jong u ki la pyrshang ban pynngat ha ki Democrats, wat haba ki rangbah jong ka U.S. ki la kynnoh ïa baroh arliang mamla namar ka jingbym ïoh pisa ka la pynthut ïa ka jingleit jingwan jong ki liengsuiñ, kaba la iehnoh da ki spah hajar ngut ki nongtrei sorkar pdeng khlem tulop bad ki kynthup ïa ki katto katne kiba kham rit paid ha America na ka bynta ka jingïarap bam. Hynrei ka lah ruh ban pyni ia ka jingbymsngewhun kaba kham heh bad kiwei pat ki jingkylla kiba phylla – bad kiba pynïapher – jong u Trump ïa ka sorkar pdeng ha kine ki bnai ba la dep, kynthup ïa ka jingpynhiar ïa ki tnad treikam bad ka jingpynïaid ïa ki umsaw jong ka jingpynkylla kam paidbah.
