Shillong, Naiwieng 16
Ka tamasa Cherry Blossom 2025 ka la kut noh ha ka 15 tarik Naiwieng haba ki paidbah ki la wan sngap ïa ki nongrwai kiba pawnam kiba la rwai ha Jawahalal Nehru Stadium Polo.
Kine ki nongrwai kiba pawnam kiba la rwai ha ka sngi kut ki long ka Aqua kaba la kiew rynsan nyngkong, u Tyga bad Diplo.
Ha kane ka sngi pynkut la ïohi ba ki paidbah ki la kham bun kiba wan lehkmen ha kane ka tamasa namar ha baroh ki jingïalehkai ki la dap briew beit ha madan Third Ground watla ki nongrwai ki la rwai ha JN Stadium.
Katkum ka jingbatai kiba ap pahara kiba talasi ïa ki pla jong ki kynthei bad shynrang shwa ban rung sha madan ki la ïathuh kumba 80 percent kiba wan sha kane ka tamasa ki dei ki briew nabar ka jylla bad 20 percent ki dei na Meghalaya.
Shuh shuh la ïohi ba u Myntri Rangbah ka jylla u Conrad K Sangma u la wan ïaid kjat nyngkong ha madan Third Ground ban leit peit ïa ki jingïalehkai bad khatduh u la leit sha JN Stadium ban leit peit sa ïa ki nongrwai na bar ri.
Ki paidbah kiba wan sha kane ka tamasa ba khatduh ki la rung dang kloi sha JN Stadium namar la phah rwai nyngkong ïa ka kynhun Aqua kaba la rwai ha ka por 7:30 janmiet bad pynkut ha ka por 8:30 janmiet.
Namar ha ka sngi sdang kane ka tamasa bun ki paidbah kim tip ba la rwai kloi ta ka daw ha ka por ba rwai ka Nora ka madan JN Stadium ka duna briew hynrei ha ka sngi kut mar shu kem dum ka madan ka la sdang dap.
Ha ka sngi Saitjaiñ u Tyga uba dei u nongrwai u la leitkai pyngngad sha Khyndailad ha ka por 2:00 baje nohphai sngi bad wanphai sha jaka sah ha Vivanta Hotel ha por 3:30 janmiet.
Kane ka jingleitkai ka long shwa ban leit pynshongshit ïa ki paidbah ha sngi kut ka tamasa Cherry Blossom ha JN stadium Polo.
Haba u Tyga u leitkai la ïohi ba la synran ïa u da ki bor pahara khnang ban nym shah ïa ki paidbah ban leit tur shajan.
Haba phai pat sha ka Japan Arena kaba don ha Ward’s Lake ka la plie lad ïa ki nongwan kai ba kin sakhi ïa ka kolshor ba kyrpang, ki jingpyninam ki bapher-bapher, ki jingdro bad kiwei kiwei de.
