Shillong, Naiwieng 16
Ka Tyrsad Area Sports Association (TASA) ka la sdang ïa ka lympung ïalehkai ba la tip kum ka TASA 1st Division Football League 2025 ha ka sngi Saitjaiñ ha madan Mawlum, Tyrsad.
Ha kane ka lympung ki la don 12 tylli ki kynhun ha kaba la phiah ha ki ar tylli ki group. Ha ka Group-A ki long ka Mawlum Tyrsad SC, Nongspung AYSCSA, Perkseh SC, Rangshangkham SC, Wahlyngkien Sunei SC bad ka Mawdngong SC. Katba ha ka Group-B ki long ka Umkaber SC, Umkseh SC, Kyrphei SC, Mawponghong SC, Thaiñthynroh SC bad ka Mawkynroh SC.
Haba phai sha ki jingïalehkai ha katei ka sngi sdang, ka Mawlum Tyrsad ka la pynliem noh ïa ka Nongspung AYSCSA da 1-0 kol bad ïa kane la thep da u Bashem Khongsit ha ka minit kaba 48.
Ha kawei pat ka jingïakhun kaba ar, ka Umkseh ka la jop da 1-0 kol ïa ka Umkaber bad ïa kane la thep da u Tyngshaiñ Umdor ha ka minit kaba 71.
Ïa kane ka lympung la wan ban plie da u Bah Auspicious Lyngdoh ryngkat ka jingdonlang u Lyngdoh Hima Lyngïong Bah Hamphrey Lyngdoh, kumjuh u Bah Manikstar Umdor, Sirdar ka Hima Pamsanngut bad kiwei ki riew rangbah.
Kane ka lympung kan bteng biang ha ka 19 tarik ha kaba ka Perkseh kan ïakhun pyrshah ïa ka Rangshangkham ha ka por 12 baje mynsngi, katba ka Kyrphei ïa ka Mawponghong ha ka por 2:30 nohphai sngi.
