Mawkyrwat, Naiwieng 17
Ka ïingbishar u Special Judge (NDPS) South West Khasi Hills District ha ka 11 tarik u Naiwieng, 2025 ka la rai pynrem ïa ki lai ngut ki nongkhaïi drok da kaba pynngat haduh 10 snem ka jingshong phatok bad daiñ kuna ruh mar T.1 lak uwei namar ki kam khaïi drok hapoh ki kyndon jong ka Narcotic Drugs and Psychotropic Substances Act.
Kine kiba la shah rai pynrem ki long u Somison Sangma, 24 snem, u Gopal Barman, 24 snem bad u Jewel D Sangma, 22 snem bad kine baroh ki dei na Nongkriah, East Khasi Hills District.
Katkum ka jingïathuh u Superintendent of Police jong ka South West Khasi Hills District u Bah B Jyrwa u la ïathuh ba ïa kitei ki lai ngut la ïoh bat da ki BSF ha ka 19 tarik u Kyllalyngkot jong u snem 2024 na ka thaiñ Ranikor bad hadien kata la kem noh da ki pulit.
U SP u la ïathuh ruh ba ha ka jingkhynra bad jingtohkit, ki pulit ki la ïoh ban kurup 9 song ki kynja drok kiba don haduh kumba 1728 tylli ki dawai kuli bad kiba la suba ba ki dei ki dawai kuli Yaba.
Ïa kitei ki lai ngut la mudui mukotduma pyrshah ïa ki bad la pynngat ruh ha ki kyndon aiñ jong ka NPDS Act.
Ïa kane ka mukotduma la ‘charge-sheet’ ha ka 3 tarik u Jymmang, 2024 bad la phah ïa ki sha ka ïingbishar u Special Judge NDPS Mawkyrwat bad ïa kine ki lai ngut ka ïingbishar ka la rai pynrem noh namar ki kam khaïi drok jong ki.
