Patna, Naiwieng:
U Myntri Rangbah ka Bihar, u Nitish Kumar, ha ka lah sngi U Blei, u la ïakynduh ïa u Lat ka Jylla, u Arif Mohammad Khan, ha Raj Bhavan bad kyrpad ïa u, ba un pynwai noh ïa ka dorbar kaba mynta, ha ka 19 tarik, Naiwieng, shisngi shwa ka jingsmai kaba lah ban long jong ka sorkar thymmai jong ka National Democratic Alliance (NDA) ha kane ka Jylla.
U Nitish, un shim smai, ha ka sien kaba 10, kaba la buh rekod, naduh u snem 2005. Ka jingpynbam smai, ka lah ban long ha Gandhi Maidan, ha ka 20 tarik, Naiwieng, ha kaba yn ïashim bynta lang da u Narendra Modi, Myntri Rangbahduh bad kiwei ki riew pawkhmat, ba kynthup ïa ki katto katne ngut ki Myntri ka sorkar pdeng bad ki Myntri rangbah jong ka jylla ba synshar ka BJP.
Ha ka step jong ka lah sngi U Blei, u Nitish u la pynïaid ïa ka jingïalang jong ka kynhun Myntri ka jylla, kaba la ai bor ïa u ban kyrpad ïa u Lat ban pynduh noh ïa ka ïingdorbar kaba mynta ha ka 19 tarik u Naiwieng.
Shwa ïa kane, yn jied ïa u Nitish kum u nongïalam jong ka NDA Legislature Party. Baroh ar ki seng, ka Bharatiya Janata Dal bad ka Janata Dal (United) ki la khot ïa ki jingïalang jong ki seng thaw aiñ ban plie lad ban buh ïa ka sorkar NDA kaba thymmai ha kane ka jylla. Na ka bynta kane ka jingthmu, yn jied ïa u kum u nongïalam jong ka seng thaw aiñ jong ka NDA.
U president ka BJP ka Bihar, u Dilip Jaiswal, u la ong ba u Nitish un shim smai biang kum u Myntri Rangbah.
“Ka jingpynkhreh ka dang ïaid shakhmat ha Gandhi Maidan na ka bynta ka jingshim smai, la khmih lynti ba u Myntri Rangbahduh ka ri u Narendra Modi ruh un ïadonlang ha katei ka sngi bam smai”, u la ong ha ki lad pathai khubor.
Hadien ka jingpynbna ïa ki nongjop ha ka ilekshon, ki nongïalam jong ki seng ba la ïatreilang ki la ïakynduh ïa u Nitish Kumar ha ka ïing sah jong u ha Patna ban ïakren halor ka jingthaw ïa ka sorkar bathymmai.
Ka la don ka jingkynnoh ba katto katne ngut ki briew kiba thymmai ki lah ban shah pynrung kum ki Myntri ha ka kynhun Myntri kaba thymmai hapoh ka jingïalam jong u Nitish.
