Hyderabad, Naiwieng:
Kawei ka bos, kaba kit ïa ki nongleit ïaid riewblei sha Umrah, ka la kem ding ha Saudi Arabia, hadien ba ka la ïa tyngkhuh bad kawei ka trok tanker, ha kaba 45 ngut ki briew, ki la ïap, ba kynthup ïa 20 ngut ki kynthei bad 11 ngut ki khynnah. Ki heh jong ka Immigration ha Hyderabad, ki la pynthikna ba kiba bun na kitei ki briew, ki dei kiba na katei ka nongbah. Ha kane ka bos, la don tang uwei u nongleit ïaid riewbleiba la lait im.
La ïathuh ba katei ka jingjia aksiden, ka la jia ha ka por 1:30 baje mynstep IST, ha Mufrahath, kaba don hapdeng ka Badr bad ka Madinah, ha ka surok kaba heh bad kaba ju kham jia kiba kum kine ki jingjia, kaba ju don ki kali kiba ïaid stet bha. Kiba bun ki nongleit ïaid riewblei ki dang ïohthiah ha katei ka por, dei kane kaba la pynlong ïa kiba bun ki briew ba kin ïap.
U Myntri Rangbahduh ka ri, u Narendra Modi, u la pynpaw ïa ka jingsngewkhia halor kane ka jingjia, ha kaba u la pynpaw ïa ka jingsngewlem sha ki longïing kiba la duh noh ïa ki baïeid-bathoiñ.
U Dr. S. Jaishankar, Myntri ka tnat korbar ri, u la pynpaw ïa ka jingsngew kyndit kaba jur, ha kaba u la ong ba ka Embassy ha Riyadh bad ka Consulate ha Jeddah ki ai ka jingkyrshan kaba pura ïa ki nong India bad kiba haïing hasem jong ki.
U Police Commissioner ka Hyderabad, u VC Sajjanar, u la pynthikna ba ki don 45 ngut ki briew, kiba ïap ha katei ka jingjia aksiden, ha kaba tang uwei uba lait im, uba dang shah sumar mynta ha Hospital.
