Shillong, Naiwieng 17
Ka Sorkar ka la rai ban pynthymmai ïa ki dor jong ki jingpynbna da 26%. Ïa ki dor na ka bynta ki jingpynbna khlem rong ha ki kot khubor ha ka shi sq.cm. na ka bynta shi lak tylli ki kot khubor la pynkiew na ka T.47.40 sha ka T.58.68, ka jingkiew kaba 26%. Ka Sorkar ka la mynjur ruh ïa ki jingai jingmut jong ka komiti kiba ïadei bad yn tyrwa ïa ki jingsiew ba kham bha na ka bynta ki jingpynbna ba don rong, ka jingbuh kyrdan ba kyrpang.
Ka Central Bureau of Communication (CBC) ka dei ka nodal Media Unit hapoh ka tnad Information and Broadcasting ban shim ïa ka jingkitkhlieh ha kaba ïadei bad ki jingpynbna paidbah na ka bynta ki ki tnad bapher-bapher jong ka Sorkar India ha ki lad pathai khubor bapher-bapher, kynthup ïa ki kot khubor, kiba la pynïasoh bad ka CBC na ka bynta kane ka jingthmu. Ïa ki dor ban pynmih ïa ki jingpynbna ha ki kot khubor da ka CBC la pynthymmai khatduh da ka tnad halor ki jingai jingmut jong ka 8th Rate Structure Committee (RSC) ha ka 09.01.2019, kiba treikam na ka bynta ka samoi kaba lai snem.
Ka Komiti ka bishar bniah ïa ka jinglut jong ki kot khubor
Ïa ka 9th Rate Structure Committee hapoh ka jingpynïaid jong ka AS&FA (I&B) la thaw ha ka 11 tarik Naiwieng, 2021 na ka bynta ban ai jingmut ha kaba ïadei bad ka jingpynkylla ïa ki dor na ka bynta ki jingpynbna jong ka Sorkar ha ki kot khubor.
Ka komiti ha ka jingïalang jong ka hapdeng u bnai Naiwieng, 2021 bad u Nailar, 2023 ka la bishar bniah ïa ki jingai jingmut na ki seng kot khubor bapher-bapher jong ki kot khubor kiba rit, kiba pdeng bad kiba heh, kata ka Indian Newspaper Society (INS), All India Small Newspapers Association (AISNA), ka Small-Medium-Big Newspapers Society (SMBNS) bad kiwei-kiwei kiba don bynta ha kane ka kam. Ka komiti ka la ïakren ruh halor ki kyndon bapher-bapher kiba don ka jingktah ïa ki dor jong ki jingpynbna ha ki kot khubor, kum ka jingkiew dor jong ka WPI ha kaba ïadei bad ki kot khubor, ka jingsiew, ka jingkiew dor, ka jinglong jong ka dor jong ki kot khubor ba la wanrah nabar ri, ka jinglut jingsep ha ka jingpynkhreh, bad kiwei-kiwei. Ka komiti ka la aiti ïa ki jingai jingmut jong ka ha ka 23 tarik Nailur, 2023.
Ka jingkyntiew ïa ka jingkamai bad pynkhlaiñ ïa ki kot khubor.
Ka jingpynkiew dor ïa ki jingpynbna jong ka Sorkar ha ki kot khubor kan wanrah katto katne ki jingmyntoi kiba kongsan, na ka bynta ka Sorkar bad ka lad pathai khubor. Ki dor kiba kham heh na ka bynta ki jingpynbna jong ka Sorkar kin ai ka jingkyrshan khajna kaba donkam bha sha ki kot khubor, khamtam ha ka juk jong ka jingïakhun na kiwei pat ki rynsan pathai khubor bapher-bapher bad ha kaba ïadei bad ka jingkiew dor ha kine ki khyndiat snem ba la dep. Kane ka lah ban ïarap ban pynneh ïa ki jingtreikam, ban pynneh ïa ka jingthoh khubor kaba bha, bad ban kyrshan ïa ki sienjam thoh khubor ha ka thaiñ. Da kaba kyntiew ïa ka jingshngaiñ ha ka jingkamai, ki kot khubor ki lah ban bei tyngka ha ki kam kiba kham bha, da kaba shakri kham bha ïa ka jingmyntoi jong ki paidbah.
Ka jingpynkylla ha ki dor jingpynbna ka lah ban pynïadei bad ki jinglong kiba kham ïar ha ka jingpyndonkam ïa ki lad pathai khubor. Da kaba ithuh ïa ka jingkongsan jong ki kot khubor ha ka rukom ai khubor bapher-bapher, ka Sorkar ka lah ban buh thong kham bha ïa ki rukom ai jingpyntip jong ka, da kaba pynthikna ba kin poi sha ki nongshong shnong ha kylleng ki rynsan bapher-bapher.
