Shillong, Naiwieng 17
U Myntri Rangbah ka Jylla u Conrad K Sangma u la pyntip ba ka Jylla ka la phah haduh 37 ngut ki Nurse ba la trei sha ka ri Japan bad ka Jylla Meghalaya ka la pynkhlaiñ ïa ka jingïatreilang ha kiba bun ki kam.
Ïa kane u la pynpaw haba kren ha ka jingïalang plie ïa ka Japanese Language Training Programme ba la pynlong da ka Meghalaya State Skill Development Society, Department of Labour, Employment & Skill Development ka Jylla, ha ka sngi Nyngkong ha Moint View Builsing, Barik, Shillong.
Haba ai jingkren u la u la ïathuh haba ïadei ka jingïaidlynti ka jingïatreilang bad ka Japan, da kaba u la ong ba ar snem mynshuwa tang arngut ki nurse la phah sha Japan bad haduh mynta, ki la don haduh 37 ngut ki nurse ha Japan bad bun kin sa nang leit ha kine ki bnai ban wan.
“Ki nurse jong ngi kiba trei ha Japan mynta ki la don ha ka N4 Grading bad ngi kyrmen ba ki Nurse jong ngi kin poi ha ka N3 Grade ba kin ïoh ka tulop ba kham heh. Ki nurse jong ngi ki lah ban phah pisa sha la ïing haduh T. 1 lak bad ka jingkylliang pisa ha ka Jylla jong ngi lyngba kine ki 37 ngut ki nurse ka la kot kumba T.5 klur shisnem” ula ong.
U Myntri Rangbah ula pyntip ba ki 37 ngut ki nurse kiba don ha Japan ki hap ban leit hikai pyntbit ïa ka ktien Japan ha Bangalore kaba long haduh hynriew bnai, hynreiu la ong ba “Phi long kiba donbok namar mynta phin ïoh ïa ki jinghikai pyntbit ha Shilllong.”
U Myntri Rangbah ula ong ba ka Sorkar ka kwah ban ai kali sha ki samla ka Jylla ba kin leit sha Japan, ym tang ban kamai jakpoh hynrei ban ïoh ruh ïa ki jingshemphang bad ong “Dei hangne ba ka jingïatehlok hapdeng ka ASEAN Group bad ka Sorkar Meghalaya ka la mih bad ngi kum ka Sorkar ngi la pynbeit lut ïa kiei kiei baroh”.
Haba pdiang ïa ki arngut ki nonghikai na Japan, u Myntri Rangbah ula ong ba watla kin don ki jingeh, ka Sorkar bad ki nongshong shnong ka Jylla kin ïaleh katba lah ban pynthikna ïa ka jingwansah jong ki ha ka Jylla ba kan long kaba suk ka saiñ.
U Conrad u la bynrap ba ka Japan bad ki Jylla ka thaiñ shatei-lam Mihngi ki don ka jingïasyriem ha kiba bun ki liang, la ka dei ka bam ka dih, ka kolshor bad kiwei bad ka ri Japan ka dei kaba la ïatreilang bad ka ri India la bun bun snem.
Ki don haduh 86 ngut ki samla pule kiba la pynrung kyrteng ha ka ban leit pyntbit ïa ka ktien Japan lane ka Japanese Language Training Programme ba hynriew bnai.
