Shillong, Naiwieng 17
Ki kam tuh kam thiem la ka long ïa ki kali arshaka ne saw shaka, ki ïing ki sem, ki dukan bad ïa kiwei kiwei ki tiar ki dang ïai bteng na kawei ka por sha kawei pat bad ïa kane la sakhi na ki jingjia shah tuh jong kiba bun tylli ki arshaka bad ka jingshah prong tuh jong ki ïing ki sem.
Katkum ka khubor kaba la ïoh na ki pulit la ong ba u Johna Chongloi u la ai ka jingujor ba ha ka miet jong ka 12 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AC-9597 na phyllaw jong ka jaka sah ka jong u, kaba don ha Madanrting, Block-F.
Ha kawei pat ka khubor, ka Sawant Kaur ka la ai ka jingujor ba ha ka 12 tarik mynta u bnai, ki runar bym lah ban ithuh, ki la tuh ïa ka arshaka ka jong ka, kaba don ïa u registration number ML05-AF-7316 na ka phyllaw jong ka jaka kaba don ha Madanrting, Block-F.
Katba na ka liang jong u Bah Evannesar Kharchandy u la ai ka jingujor sha ki pulit ba ha ka 12 tarik mynta u bnai, ki runar bym lah ban ithuh ki la prong tuh hapoh ka ïing ka jong u, kaba don ha Umphyrnai Dymmiew, Shillong bad ban rah tuh ïa ka ksiar kaba shongdor kumba T.2.5 lak bad ka pisa kaba long T.50,000/-.
Ha kawei pat ka khubor, u Bah Markhiador Kharsyntiew u la ai ka jingujor ba ha ka 10 tarik mynta u bnai, ki runar bym lah ban ithuh ki la prong tuh ha kawei ka quarter kaba khlem sah briew kaba dei jong ka Khasi Hills Wildlife Division kaba don ha Mawpun Lumsohkynphor Hills, Shillong, ha kaba ki la pynjot pynpra ïa ki jingkhang ïit, ki tiar bording bad ki pipe nalor kiwei-kiwei.
Kumjuh ruh na ka liang jong u Parna Das u la ai ka jingujor ba ha ka step jong ka 14 tarik mynta u bnai, ki runar bym lah ban ithuh, ki la prong tuh hapoh ka dukan jong u, kaba don ha ïew Polo, Shillong bad ban rah tuh ïa ka pisa kaba long T.60,000/-.
Ha kawei pat ka khubor u Ardonki Rani u la ai ka jingujor ba ha ka 14 tarik mynta u bnai, ha ka por kumba 6.15 janmiet, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AA-3750 na ka thaiñ Golf Links, Shillong.
Kumjuh ruh u Melvin Taylor Marbañiang u la ai ka jingujor ba hapdeng ka miet jong ka 14 bad15 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AF-9900) na ka thaiñ Golf Links, Shillong.
Katba na ka liang jong u Khrawbok Kshiar ha ka jingujor kaba u la ai, la ong ba ha ka miet jong ka 14 tarik Naiwieng, u la lap ba ka arshaka ka jong u, kaba ym pat don number plate, kala jah na Lad Shyiap, Golf Links, Shillong.
Na ka liang jong u Gabriel Nongrum ruh u la ujor da ka ktien ha ka 15 tarik mynta u bnai, u la lap ba ka arshaka jong u, kaba don ïa u registration number ML05-AD-5306 ka la jah na ka jaka ba pynïeng na Golf Links Tri-Junction, Shillong.
