Shillong, Naiwieng 17
Ka Pohkseh SC ka la pynliem noh ïa ka Nongkrem SC da 3-1 kol ha ka lympung ïalehkai SSA First Division Football League, katba ka Ryntih SC ka la wanphai da ka jingjop kaba nyngkong, ha ka lah sngi U Blei.
Tang mar ïasdang ka jingïa-lehkai ka Pohkseh ka la ïoh ban thep ar kol hapoh ki khadsan minit lyng -ba u Badonkupar Shadap (10) bad u Nivodimus Lyngkhei (15). Hadien ba ka la bteng ïa ka kylla miet ka Nongkrem ka la pynphai kylla shi kol lyngba u Zothanpuia Puia (48) hashwa ba ka Pohkseh kan thep biang sa shi kol lyngba u Jeferson Malngiang (65) bad ban khur syndon ïa ka jingjop.
Lyngba kane ka jingjop kaba lai, ka Pohkseh ka la lah ban pynskhem ïalade ban ïai neh ha kane ka lympung ha kaba ka la kamai 11 poiñ na ki khyndai sien ïakhun bad ban don ha ka kyrdan ba san, katba ka Nongkrem ka la hiar noh sha ka kyrdan ba hynñiew bad 9 poiñ.
Haba phai sha kawei pat ka jingïakhun kaba la long kham hashwa, ka Ryntih ka la pynliem noh ïa ka Nongrah SC da 2-1 kol.
Watla ka Nongrah ka la pynkhih jar ha ka minit kaba 34 lyngba u Mebaiskhem Lyngkhoi, hynrei ka Ryntih ka la lah ban pynphai kylla ar kol lyngba u Banlam N Kharbhih (45+2) bad u Leversharp M Syiemlieh (88) na ka bynta ban khur syndoh ïa ka jingjop.
Da kane ka jingjop, ka Ryntih ka la kamai 4 point ha kaba ka dangdon hapdeng ka jingïaknieh lait hiar ryng-kat ka Nongrah (5 poiñ) bad ka Lawsohtun (2 poiñ) ha kaba ka rai kaba khatduh kan shong ha ka jingmih jong ki jingïalehkai kiba khatduh.
Ka jingïalehkai ha ka sngi Ba-ar kan long hapdeng ka Mawtawar SC pyrshah ïa ka Nongthymmai SC ha ka por 2 baje nohphai sngi.
