Shillong, Naiwieng 17
Ka Meghalaya ka la jam sha ka phainal ha ka lympung ïalehkai State A Trophy 2025-26, hadien ba ka la pynliem noh ïa ka Mizoram da 23 ron ha ka lah sngi U Blei ha Chandigarh.
Kane ka nam jop ka la wan urlong lyngba u Dipankar Baruah, uba la lah ban kamai 101 ron bad ïai neh haduh kaba kut (not out) bad u Md Ashif Khan u la kamai 72 ron bad ka la biang pura ïa ka Meghalaya ban khur ïa ka jingjop ha kaba san sien lynter jong ka, katba ka Mizoram kaba wan ba-ar na kane ka thup, kan dei ka nam kaba nyngkong jong ka ha kane ka lympung.
Haba phai sha kane ka jingïakhun, ka Meghalaya hadien ba ka la jop ïa ka jingkynting pisa ka la kam trai ba kan tied nyngkong, ha kaba ïa ka jingïakhun la hap ban pynhiar noh sha ki 44 over na ka daw ka jingsngem bad jhieh ka madan.
Hynrei na ka liang ka Meghalaya ka la lah ban kamai 217 ron hadien ba ka la hap noh ar wiket, bad ka Mizoram ka la donkam 220 ron ba kan beh ïa ka thong na ki 44 over, kaba long katkum ka kyndon jingkheiñ jong ka VJD Method, hynrei ha kaba kut, ka Mizoram ka la lah ban kamai 196 ron na ki 41.3 over.
Wat la katta ha kaba sdang eh jong ka jingwan beh ïa kane ka thong, shipor, ka Mizoram, ka la ïoh ïa ka jingsdang ba paka hadien ba u Johan u la kamai 85 ron na ki 69 bol bad Sahil Sharma 66 ron na ki 96 bol bad kine baroh arngut ki la seng ïa ka nongrim kamai paralok kaba 139 ron na ka bynta ka wiket ba nyngkong.
Hynrei shwa ba kine ki arngut kin lamkhmat ïa ka kynhun, u Shavian Blah (2/18 na ki 5 over) ka la plie lad ïa ka jingsdang ban khyllem ki wiket jong ki nongtied ka Mizoram bad ki 10 tylli ki wiket ki la hap hadien ba la kamai tang 57 ron.
Wat lada u Shavian u la plie lynti ban pynhap wiket, hynrei u nongkawang bol ba paw ka Meghalaya, u Denikcheng Marak (3/49 na ki 9 over) bud sa u Chandra Bahadur Thapa (2/33/ na ki 9 over).
Kumta ha kaba kut jong kane ka jingïakhun, kine ki artylli ki jylla kin ïakhreh ban mih madan ban ïa aireng biang hapdeng para ma ki naka bynta ka phainal kaba la buh ban long ha Mohali ha ka sngi Balang.
