Shillong, Naiwieng 17
U Myntri Rangbah ka Jylla, u Conrad K. Sangma ha ka Lah Sngi U Blei u la ong ba ka Sorkar kan mang T.50 klur sha ka Airport Authority of India (AAI) na ka bynta ban sdang ïa ka kam ha ka Kad Liengsuiñ Jengjal.
“Ngi la aiti ïa ka Kad Liengsuiñ Jengjal sha ka AAI ha kaba sdang jong une u snem bad ki la aiti ïa ka jingkheiñ kaba T.50 klur sha ka Sorkar Jylla. Nga sngewkmen ban pynbna hangne ba hapoh une u bnai, ka Sorkar kan sa mang T.50 klur sha ka AAI khnang ba ki kam ki la lah ban sdang ha ka Kad Liengsuiñ Jengjal,” ong u Conrad haba ai jingkren ha ka jingïalang plie ïa ka ïingmala jong ka thanad Jengjal.
U la pyntip ruh ba da ka jingpyndep ïa kane ka Kad Liengsuiñ, ki liengsuiñ ba 19 tylli ki jaka shong jong ka Air Alliance kin sa treikam na Kad Liengsuiñ Jengjal da kaba buh hakhmat eh ïa ki liengsuiñ Shillong-Tura.
U Myntri Rangah u la ong ruh ba ka Sorkar ka dang wad jaka ha Jengjal na ka bynta ka jaka kaba neh ban pynlong ïa ki jingïalang bah.
