Shillong, Naiwieng 17
U Working President ka National People’s Party (NPP) uba dei ruh u Myntri Sorkar, u Marcuise N. Marak u la ong ba haduh mynta ka seng kam pat shim ïa kano-kano ka rai la kan don ne em ka jingïateh lok (kaba hashuwa) hapdeng ka NPP bad kiwei pat ki seng saiñ pyrthei kiba don kajuh ka jingmut na bynta ban ïakhun ïa ka ilekshon ban wan sha ka Garo Hills Autonomous District Council (GHADC).
“Haduh mynta ngim pat rai kumno ban leh ïa kane. Kan shong ha ka seng. La ngi leit marwei ne bad ki paralok ba ïatreilang, ïa kata yn sa rai hadien,” ong u Marcuise haba kren sha ki nongthoh khubor ha ka Lah Sngi U Blei.
U la kdew ruh ba ka samoi treikam jong ka Council kaba mynta kan kut ha u bnai Ïaïong, 2026 – kaba pyni ba ïa ka por ban pynlong ilekshon lah ban pynbna ha u bnai Rymphang, 2026.
U Marcuise u la pynpaw ïa ka jingkyrmen skhem ba ki kam pynroi jong ka NPP hapoh ka jingïalam u Myntri Rangbah ka Jylla, u Conrad K. Sangma kin sawa kum ka mat ïakren hapdeng ki nongthep ‘vote’, khamtam namar ka jinghiar jong ka Congress hadien jong ka ilekshon ha Bihar.
“Ngam ong ba kan long kaba suk naba man la ka ilekshon ka long kaba pher. Hooid, ka lyer jong ka Congress ka la hiar namarba ka lyer kaba ki la pyrshang ban wanrah ka la hiar hadien ka ilekshon ha Bihar. Kumta, yn hap peit kaei ka jait lyer kan don haba ïadei bad ka District Council. Ka paw shai ba ngi don ka jingkyrmen ban ïoh jingkyrshan na ki paidbah ka Ri-lum Garo namarba ka Sorkar Jylla ka treikam bha hapoh ka jingïalam jong u Conrad K. Sangma, kaba dei ka seng kaba bun paid eh – kaba dei ka NPP,” u la ong.
U la ban jur halor ka jingdonkam ban wanrah jingkylla bad ka jingskhem ha GHADC, da kaba kyntu ïa ki nongthep ‘vote’ ban kyrshan ïa ka NPP na ka bynta ka jingkylla ha ryngkat ka jingthmu kaba ïohi jngai jong ka District Council.
“Ngi la pynbeit ïa ki mat kiba ïadei bad ka District Council. Kumta ngi don ka jingkyrmen namarba ka kam haba ïadei bad ka jingpynkylla dur ïa ka District Council ka la dep ban sdang. Mynta ha GHADC, ngi donkam ïa ka jingkylla bad ki paidbah ka Ri-lum Garo ruh ki donkam ïa kata ka jingkylla. Kumta kan urlong tang lada ai ïa ka bor sha ka NPP, khnang ba ka lah ban pyntikna sha ki paidbah ka Ri-lum Garo ba ngi lah ban pynbiang ïa ka jingskhem bad ka mishon ryngkat ka jingkylla bad ka thong ba ïohi jngai na ka bynta ka District Council ha Ri-lum Garo.”
Haba kylli, u la ong, “Nga mynjur ba ka don ka jingbymhun haba phai sha ka synshar-khadar ha District Council, hynrei ka Sorkar ka la leh ruh ïa shibun kiei-kiei na ka bynta ka District Council. Kumba phi tip, ïa ki mat kiba la pynthut ïa ka jingtreikam jong ka District Council la pynbeit dang shen da u Myntri Rangbah da kaba pynbna bad thaw ruh ïa ki komiti lem bad ki ‘Sub-Committee’ bad lyngba jong ki, la lah ban pynbeit ïa baroh, bad mynta ka jingtreikam jong ka District Council ka la sdang biang bad ka jingsiew tulop ka la sdang,” u la ong.
U Marcuise u la pyntip shuh-shuh ba ka seng ka dang don hapdeng ka jingpynkhreh ban jied ïa ki kyrtong na ka bynta ka ilekshon ban wan sha ka GHADC, watla ka jingïalap ilekshon ruh kam pat sdang.
