Shillong, Naiwieng 18
Ka Ïingbishar Megha-laya High Court kala bthah ïa ka Khasi Hills Autonomous District Council (KHADC) ba kan pynkhreh ïa ka thup kaba bniah bha jong ki ‘sanction post’ bad ki nongtrei, kynthup ki nongtrei ‘casual’, kiba trei ha ki kyrdan bapher-bapher hapoh ka shi taïew.
Ïa kane ka hukum la pynmih da ka Ïingbishar kaba khlieh da u Justice HS Thangkhiew hadien ba shong bishar ïa ka mudui jong ki palat 30 ngut ki nongtrei kiba ïakhun pyrshah ïa ka hukum jong ka Executive Committee ka VPP ha KHADC ba pynduh ïa ka hukum thungkam pura ïa ki.
“Ha ka jingshong bishar, la paw ba ka long kaba donkam na ka bynta ka jingpynkhreh ïa ka thup kaba bniah da ka District Council haba ïadei bad ka jingdon ki ‘sanction post’ kiba don bad ka jingdon ki nongtrei ha man ki kyrdan, kiba la thungkam pyrshah ïa kine ki ‘sanction post’. Ka jingdonkam ka long ruh ban aiti ïa ka thup ba ïadei bad baroh ki nongtrei jong ka District Council, khamtam ka jingdon ki nongtrei casual kiba shakri ha ki kyrdan bapher-bapher,” ong ka Ïingbishar.
Ka Ïingbishar kala aipor shitaïew ïa ka KHADC ba kan pynkhreh ïa ka thup, ka ban kynthup ruh ïa ki jingtip ba bniah jong ki nongtrei ‘Casual’ kiba trei ha ki kyrdan bapher-bapher.
Ïa kane ka mukotduma la buh ban shong bishar biang ha ka 1 tarik Nohprah, 2025.
“Ka hukum ba shipor (ba pynsangeh ïa ka jingpynduh ïa ka jingthungkam pura ïa ki nongtrei casual) bala pynmih kham hashuwa kan dang ïai treikam tad haduh da pynmih da kawei pat ka hukum,” ong ka Ïingbishar ha ka hukum.
