Shillong, Naiwieng 18
U Bah Ardent Miller Basaiawmoit, MLA ka Nongkrem Konstitwensi u la leit ban buh da ka shithi sha u Myntri Rangbah ka Jylla, u Conrad Sangma ban dawa, ban thaw da ka jingtohkit ba laitluid (Independent Inquiry) ïa ka rukum pyntreikam ïa ki skhim jong ki MLA naduh u snem 2008, da kaba sdang shwa na Nongkrem Konstitwensi.
Ha kane ka sngi leit buh shithi u Bah Ardent sha u Myntri Rangbah ka Jylla, la leit synran lang da u MLA ka Mawlai Konstitwensi, u Bah Brightstarwell Marba-niang.
Ka jingleit buh u Bah Ardent ïa ka shithi, kadei hadien ka jingkren u Conrad kaba u la ong, ba ki don ki MLA ka liang pyrshah ki bym shym treh ban pan skhim na ka Sorkar bad kim shym la pyntreikam bha ïa ka skhim ban pynroi ïa ki Konstitwensi jong ki.
Haba kren sha ki lad pathai khubor, u Bah Ardent u la ong ba kane ka jingkren u Myntri Rangbah lehse ka thew beit ïa ka VPP bad lehse ka dei namar ba u la sngew shongshit eh ba don ki dkhot ba wan pynïasoh sha ka seng kaba la pynlong ïa u Myntri Rangbah ban kren ïa kitei ki kyntien.
“Ka jingsahdien ka Konstitwensi kam dei tang na ka daw ka MLA skhim namar tang ka MLA skhim kaba T.2.50 klur kam pat lah pynbiang ïa ka Konstitwensi hynrei kadei ruh ka kamram jong ka Sorkar kaba ki tnad treikam jong ka, kin pyntreikam janai ïa ki skhim,” la ong u Bah Ardent.
U Bah Ardent u la ong ruh ba ka rukom synshar ka Sorkar MDA kam pat long rangbah, hynrei kadei ka nongïalam ba pyrkhat tang ïa ka saiñ pyrthei bad kaei kaei kaba ki leh kam dei na ka bynta ka bit ka biang jong ka Jylla baroh kawei hynrei ka long tang ban pyntikna ba ka party ka jong ki, kan dang iai synshar ha ka Jylla da kaba pynbiej pynthame ïa ki paidbah.
U la ong “Ka jingleh ka Sorkar ba la ïalam da ka NPP kadei ka jingñiew beiñ ïa ki paidbah kiba jied ïa kiwei pat ki party”.
U la ïathuh ba ka party jong u, ka la dep thoh sha la ki jong ki MLA, haba banjur ïa ka jingdonkam ban pyntreikam ïa ki skhim ha ka lynti kaba shai.
