Nongpoh, Naiwieng 18
Ki tyngshop bad puron ba paw nam ha ki rynsan ak phlim Bollywood kiba kynthup ïa ka Daisy Shah, Dev Menaria, Hiten Tejwani, Mubeen Saudagar, Jitt Raidutt, Pallavi Debnath bad u Dimpu Baruah ki la wan ban ïuh kjat ha ka skulbah University of Science and Technology Meghalaya (USTM) ban pyllait paidbah ïa ka phlim Bollywood kaba thymmai ba la ai kyrteng ka “Bihu Attack” ha kane ka sngi kaba dei ruh ka sngikha jong u Zubeen Garg.
Na ka liang ka skulbah USTM ka la leh don burom ruh ïa ka sngi kha jong u nongrwai ba pawnam ka Ri u Zubeen Garg uba na ka Jylla Assam da kaba rwai ïa ki jingrwai kyrpang kiba utei u riew khraw u la dep thaw bad kiba long ruh ki jingrwai kiba la paw.
Ha katei ka sngi, ki tyngshop bad puron ki la pyllait paidbah ïa ka jingrwai kyrpang bad ïa ka ‘Teaser’ jong katei ka phlim kaba yn sa pyni paidbah pat ïa ka phlim kaba pura ha ka 14 tarik, Kyllalyngkot, 2026 ha ki Cinema ha kaba ïa katei ka phlim la pynwandur halor ka jingshah hiar thma kaba shyrkhei bad ha kajuh ka por ban kyntiew ruh ïa ka jinglong ki nong Assam bad kumjuh ïa ka jingleh niam Bihu.
Haba kren sha ki lad pathai khubor, ka Daisy Shah ha ryngkat bad u Dev Menaria ki la pan ïa ka jingkyrshan na ki paidbah ba kin leit ban peit ïa katei ka phlim thymmai jong ki, ka ban sa wan ha ki cinema hall.
Ki la pynpaw ruh ba ha kane ka phlim, u Zubeen Garg u nongrwai ba paw nam ka Jylla Assam u la don ka bynta kaba khraw bad ka long ruh kaei-kaei kaba dap da ka jingkmen ba kane ka sngi kaba la ïoh ban pyllait paidbah ïa ka ‘Teaser’ jong ka phlim Bihu Attack ka dei ruh ka sngi ban kynmaw burom ïa ka sngikha jong u.
