Shillong, Naiwieng 18
Ka kynhun jong ki runar kiba la tap durkhmat bha ïa lade, ka la khang lynti ïa kawei ka kali bad hadien kata ki la byrngem ïa ki briew bad ban knieh noh ïa u shabi kali, mobile phone bad ka pisa palat tyngka.
Katkum ka khubor na ki pulit la ong ba u Aminul Islam bad u Hai Mondal, ki la ai lang ka jingujor ba ha ka 17 tarik mynta u bnai ha ka por kumba 2.30 dang step, ki runar kiba ym lah ban ithuh, kiba la kah durkhmat bha ïa lade kiba don kumba 5 ne 6 ngut kiba la phong da ki jaiñ shipai ryngkat bad ka wait bad ki dieng, kiba la wan da kawei ka kali Bolero, ba la kah ruh ïa u number plate, ki la khang lynti ïa ka kali jong kitei ki nongujor.
La ong ba kane ka kynhun, ka la khang kdong ïa ka lynti ïaid jong ka kali jong ki, ka Bolero pick-up (ML08-J-2301) ha jingkieng Chengbagre Adap ha South Garo Hills, bad ha kaba ki la byrngem byrsit bad hadien kata, ki la knieh noh ïa u shabi kali, lai tylli ki mobile phone, ka pisa kaba long T.1,80,060/- bad ki kot ki sla kiba donkam.
Ha kaba ïadei bad kane ka jingjia, na ka liang jong ki pulit ki dang pynlong ïa ka jingtohkit na ka bynta ban lap ïa ki jingshisha bad ban thwet ïa ki runar kiba donkti ha katei ka kam.
