Shillong, Naiwieng 18
U MLA ka Liang Pyrshah ka TMC na Dadenggre, u Rupa M. Marak u la kynnoh ïa u Myntri Rangbah ka Jylla, u Conrad K. Sangma ba u la kyntait ïa ki nongmihkhmat ka Liang Pyrshah na ki prokram Sorkar – ha kajuh ka por da kaba kynnoh ïa ki halor ka jingbym biang jong ka roi ka par.
Halor ki jingkren ba dang shen jong u Myntri Rangbah ka Jylla-ha kaba u la kynnoh ba ki konstitwensi ba la mihkhmat da ki MLA ka Liang Pyrshah ki pyni ïa ka jingbym biang ha ka roi ka par, u Rupa Marak u la ong ba ki jingkynnoh jong u Myntri Rangbah ka Jylla ki long “kiba markhongpong, kiba ïalam bakla bad ki bym lah ban pdiang,” da kaba pynskhem ba ka Sorkar na ka por sha ka por ka la khanglad ïa ki MLA ka Liang Pyrshah ban ïashim bynta ha ki jingïalang ba la pynlong da ka Sorkar ha ki konstitwensi jong ki.
“Tang khyndiat sngi mynshuwa, nga dang ïohi ïa ka jingkren jong u Myntri Rangbah, u dang kren ba kam don kano-kano ka roi ka par ha ki konstitwensi jong ki MLA Liang Pyrshah. Hynrei kaba nga ïohi, ka long ba ka Sorkar kam kwah ban kynthup lang ïa ki MLA ka Liang Pyrshah ha ki prokram pynroi jong ka Sorkar, kaba long markhongpong. Ha kawei pat ka liang, u Myntri Rangbah u ong ba kam don kano-kano ka roi ka par ha ka konstitwensi jong ki MLA ka Liang Pyrshah, bad nangta u pyni sha ki paidbah ba kim kwah ban kynthup ïa ngi ki MLA ka Liang Pyrshah ha ki prokram pynroi. Kata ka bym lah pdiang. Nga sngewsih shi kat dei eh,” u la ong.
U Rupa Marak u la ong ba kane kam dei ka jingïalang jong ka seng ha kaba la khmih lynti ïa ka jingïashrut ha ka saiñ pyrthei, hynrei “ka prokram jong ka Sorkar ha kaba u MLA ka thaiñ u dei ban long shi bynta jong ka.”
U la kynthoh jur ïa ki bor ba synshar, da kaba khot ïa ki “bym mon” ban kynthup lang ïa ki MLA ka Liang Pyrshah bad kynnoh ïa ki bor synshar ba ki la kyntait ïa u wat ha ka ban pyntip bad khot sngewbha sha ki kam pynroi ba la ïalam da ka Jylla hapoh Dadenggre.
U MLA u la pynkynmaw ïa kiba bun ki jingjia ha kaba la kynnoh ba u la shah kyntait na ki prokram Sorkar. U la kam ruh ba shisien u la hap ban leit la ka leit hi sha ka prokram kaba ha konstitwensi jong u, naba u la kam ba um shym la shah khot satia sha ka jingïalang Sorkar kaba la pynlong hapoh ka thaiñ jong u.
Ka jingjia ka la jia ruh ha ka por ba ïasoi ïa ka MoU hapdeng ka AAI bad ka Sorkar Jylla-ka jingïalang kaba la dei ban kynthup lang ïa u MLA ka thaiñ kum u nongïashim bynta ba kongsan, hynrei ka la kylla long pynban ka rynsan ïa kaei-kaei kaba utei u nongthaw aiñ u la batai kum ka jingleh ban kyntait khnang.
“Nga leh ïa kane mynta ka dei namar ka jingsngewsih kaba nga don. Nga sngewsih shi kat dei eh ïa ka rukom ba ki la leh ïa nga. Hynnin ka sngi, ka la don ka prokram plie paidbah hapoh ka konstitwensi jong nga kaba don ha Jengjal, ïa ka ïingmala bathymmai jong ka thanad Jengjal, la plie hynnin ka sngi hynrei ym shym la pyntip ïa nga. Hynrei kum u MLA jong ka thaiñ nga la dei ban shah khot ne pyntip ha kaba ïadei bad kata. Hynrei ym don kano-kano ka jingkhot sngewbha, ym don jingpyntip na ka liang ki bor synshar ne ka Sorkar. Ngam shym la don hangta namar kane ka daw, nga sngewsih shi kat dei eh ba ki la leh ïa nga kumne.”
U la ong ba ïa ka jingshah kyntait ba na ka por sha ka por ym lah ban shu shim kum ka jingbakla.
U la buh jingkylli ruh la hato ki jingkren jong u hapoh ka Ïingdorbar ki long ka daw na bynta ka jingleh jong ka Sorkar.
“Balei la leh kumta ïa nga? Ngam tip. Hato kane ka dei namar ka daw ba nga pynsawa ïa ka sur jong nga na ka bynta ki briew jong nga hapoh Ïingdorbar? Nga rah ïa ki mat kiba bniah na ka bynta ka konstitwensi jong nga. Kum u nongmihkhmat uba don ka jingkitkhlieh, nga dei ban leh ïa kata. Kata ka dei ka kamram jong nga, kata ka dei ka jingkitkhlieh jong nga ban pynsawa ïa ka sur jong nga, ban kren na ka bynta ki briew jong nga.”
Da kaba kular ban bteng ïa ka jingïaleh jong u, u Rupa Marak u la pynbna ba “ym lah ban pynsngap jar” ïa u.
“Ngan sa kren shuh-shuh. Ngan kren. Yn ym lah ban pynsngap jar kumta ïa nga. Ym lah ban pynsngap jar ïa nga. Ngan kren shuh-shuh. Kane ka dei ka kamram jong nga ban buh hakhmat ïa ki jingeh, ki mat kiba ktah ïa ki briew ha ki shnong ki thaw hapoh ka konstitwensi jong nga sha ka Sorkar hapoh Ïingdorbar,” u la ong.
