Shillong, Naiwieng 18
Ka Raj Bhavan, Shillong ha ka sngi Ba-ar ka la rakhe ïa ka jingdap san snem jong ka Nasha Mukt Bharat Abhiyan, da kaba pynlong ïa ka jingïalang kaba kyrpang ryngkat ka jingïatreilang bad ka tnad Social Welfare jong ka Sorkar Meghalaya.
Haba ai jingkren ha kane ka sngi, u Lat ka Jylla Meghalaya, u CH Vijayashankar u la kyntu jur ïa ka sienjam ban wanrah ïa ka imlang sahlang kaba lait na u drok. U la ban jur ïa ka jingdonkam jong ka jingïai bteng ban pynsngewthuh paidbah kaba la pyntreikam tyngeh ha ki skul, ki kolej bad ha ki shnong ki thaw ban ïada ïa ki samla jong ka Jylla.
U Lat ka Jylla u Vijayashankar u la ban jur ruh ïa san tylli ki jingeh ba kongsan ha ka imlang sahlang kiba donkam ïa ka jingïarap kaba mardor bad kaba ïatreilang na ka tnad Social Welfare na ka bynta ka jingbuh jingtip bad ka jingpynsngewthuh paidbah, da kaba ong, “Ki don san tylli ki jingeh ba kongsan – u Drok, HIV lane AIDS, TB, Cancer bad ka jingpun khun ki khynnah samla.” U la kyntu ïa ka Jylla ba kan wan lang kum ka imlang sahlang bad ban ïatreilang ban pynurlong ïa ka Nasha Mukt Bharat.
U Lat u la ban jur ïa ka jingdonkam kaba kongsan jong ka jingpynsngewthuh paidbah kaba neh bad ka jingïashim bynta kaba jylliew jong ki paidbah ban tehlakam bha ïa ka jingdih pynbuaid. U la shim ïa ka kabu ban ai jingïaroh ïa ka bynta kaba la leh da ki nongshim bynta bapher-bapher, kynthup ïa ki tnad Sorkar, ki jaka pule, ki seng treimon sngewbha, bad ki samla kiba trei mon sngewbha, ha kaba pynthikna ba ka jingïalap kan poi sha ki jaka nongkyndong.
U Lat u la pynskhem shuh-shuh ïa ka jingaiti sha ka mishon da kaba ïalam ïa ka jingbam smai ban pyrshah ïa u drok ïa baroh ki nongïashim bynta. Ka jingbam smai ka ban jur ïa ka bynta jong ki samla kum ka bor jong ka ri bad la ban jur ba ka jingkylla ka dei ban sdang nalade.
Hadien kane, ki ophisar na ka tnad Social Welfare ki la ai ïa ka jingbatai bniah ïa ka jingkiew kaba kongsan kaba la ïoh hapoh kane ka jingïalap ha kine ki san snem ba la leit noh. Ki jingjop ba la kdew ki kynthup ïa ka jingpynïar ïa ki jingshakri ai jingïasyllok, ki prokram ai jingtip kiba thmu ïa ki shnong kiba kham don ha ka jingma, bad ka jingpynkhlaiñ ïa ki sienjam ai jingsumar.
Kaba kham kongsan ka long ba kane ka jingïalap ka la lah ban pynsngewthuh bad ai jinghikai ïa palat 14 lak ngut ki briew ha Meghalaya bad ka la kynthup palat 1,923 tylli ki jaka pule lyngba ki kam ai jingtip bapher-bapher.
Ïa kane ka prokram kaba la wan ban ïashim bynta ruh da u Bah Paul Lyngdoh, u nongaibuit jong ka tnad Social Welfare jong ka Sorkar Meghalaya ryngkat bad kiwei pat ki heh ophisar ka tnad, ki nongmihkhmat jong ki seng bhalang, ki nongïalam ha ka liang ka pule puthi, bad ki seng samla, bad la pynkut noh da ka jingkyntu ban don ka jingïatreilang.
Ka thong ka dang sah ban pynïaid shakhmat ïa ka thong jong ka Nasha Mukt Bharat Abhiyan da ka jingtreikam kaba kham khlaiñ, ban pynthikna ïa ka lawei kaba shngaiñ, kaba koit ba khiah bad kaba lait na ka jingdih pynbuaid na ka bynta ka Jylla bad ka ri.
