Shillong, Naiwieng 18
Ka India ka la mad ïa ka jingshah rem noh ha ka Bangladesh da 1-0 kol ha ka lympung ïalehkai AFC Asian Cup 2027 Qualifiers Final Round ha ka sngi Ba-ar ha National Stadium kaba ha Dhaka.
Kane ka shi kol ka la wan urlong lyngba u Morsalin na ka bynta ban pynlong ïa ka Bangladesh ban khur ïa ka jingjop kaba nyngkong eh ha kane ka lympung.
Kumba ka long mynta baroh ar kine ki kynhun kim shym la ïoh rung shuh sha kawei pat ka wat jingïakhun jong kane ka lympung, hadien ba ka Singapore bad ka Hong Kong ki la lah ban pynthikna na kane ka group.
Katei ka shi kol ba la thep da ka Bangladesh ka la wan hadien ba u Morsalin u la ïoh ban rah ïa ka bol na ka bynta kaba shapdeng. Lyngba ka jingïatrei lang u Rakib bad u Akash Mishra, u Morsalin u la ïoh biang ïa ka bol bad u la ïoh ban pynkhih jar na ka daw ba u rangapkol ka India u Gurpreet Singh Sandhu um shym la lah ban khanglad na kane ka jingshah thep.
Watla ka India ka la pyrshang ban pynphai, hynrei kam shym la lah ban pynurlong bad ha kaba kut ka la mad ia ka jingshah rem.
