Shillong, Naiwieng 18
Kawei ka jingjia kaba shyrkhei kaba la ïohi lyngba ka kor CCTV, ha kaba u wei u briew u la leit ban tynrah beit-beit ïa ki ar ngut ki samla kynthei kiba pule ha skulbah North Eastern Hills University (NEHU).
Katkum ka jingïoh jingtip ba la ïoh lum, kane ka jingjia kadei ba la jia ha ka janmiet jong ka 17 tarik u Naiwieng 2025, ha Gate 2 jong ka Skulbah NEHU, ha ka por 8 baje.
Hadien kane ka jingjia mar-mar la pynkit noh ïa kitei ki ar ngut sha Nazareth Hospital, Shillong ban ïoh ïa ka jingsumar.
Haba buddien halor kane ka khubor, la ïoh ban ïakren bad u Pakhynnah jong ka Daritngen Pohdukhei, kata u Bah Peitshwa Suchen u la ïathuh ba haduh mynta ka Daritngen kam shym la pat tip briew, namar ba la jur palat ka jingshitom, bad ka dangthiah ha ICU, Nazareth.
Ka Daritngen Pohdukhei ka dei na ka shnong Borkhat, East Jaiñtia Hills District.
U Bah Peitshwa u la ïathuh ba ka Daritngen Pohdukhei kadei shi paralok bad katei ka samla pule ba shah tynrah lang, ba la tip kyrteng ka Stephanie.
U la ong ba kine baroh ar ngut ki dangmih na Library kaba dei ha Skulbah NEHU, ban leit thied jingthied sha surok, hynrei kynsan-kynsan ka la wan kawei ka kali Maruti rongïong ban rad beit naphang ïa ki.
“Kum ka ïing ka sem ka sngewsih kthang halor kane ka jingjia, namar ba kam pat ju jia koit hapoh ïing pohsem kiba kum kine ki jingjia. Ka long kaba pynduh mynsiem ïa ka ïing ka sem khamtam ïa ki kmie ki kpa ba jia sngewsih kum kine,” la ong u Bah Peitshwa.
Shuh shuh u ong “Ngim pat lah ban ong eiei halor ka jingjia namar ba ka khun ka dangthiah ha ICU bad kam shym la pat tip briew haduh mynta”.
Kumta u la kyrpad ïa ki bor ba dei peit ha NEHU, ba kin shimkhia halor kane ka jingjia bad ban tynrong lem ïa ka ïing ka sem ha kum kine ki jingjia, bad ruh ïa ka Sorkar ban shimkhia lem.
