Shillong, Naiwieng 18
Ka Mawtawar SC ka la pynliem noh ïa ka Nongthymmai SC da 3-1 kol na ka bynta ban ïai neh ha ka kyrdan balai jong ka lympung ïalehkai SSA First Division Football League, ha ka sngi Ba-ar.
Lyngba kane ka nam jop ka Mawtawar ka la pynkut ïa kane ka lympung da kaba kamai 19 point, katba ka Nong-thymmai ka la ïai sah ha ka kyrdan basaw bad 13 point na ki khyndai sien ïakhun.
Haba phai sha kane ka jingïakhun ka Maw-tawar ka la pynkhih jar tang mar ïasdang ka jing-ïalehkai lyngba u Donkupar Kharmyndai ha ka minit kaba 2. Hadien shiteng kynta ka Nongthymmai ka la pynïakhaid kylla lyngba u Wanshwanaki Suphai (30).
Ka Mawtawar ka la thep biang sa ar kol ha ka kylla miet lyngba u Ïaibatkupar Dkhar (52) bad u Aldo M Nongneng (89) na ka bynta ban khur syndon ïa ka jingjop.
Ka jingïalehkai ha ka sngi Balang kan long hapdeng ka Mawkhar SC pyrshah ïa ka Ryntih SC ha ka por 2 baje nohphai sngi.
