Shillong, Naiwieng 18
Ka North-Eastern Hill University (NEHU) ka la pynrem jur halor ka jingjia aksiden kaba la jia ha ka miet Lah Sngi U Blei kaba la ïalam sha ka jingmynsaw jur jong 2 ngut ki samla pule ka skulbah.
Ka kyrwoh na ka skulbah ka ong ba katei ka jingjia kaba la jia ha ka por 7:30 baje mynmiet ka dei kaba la jia ha kaba kawei ka kali shimet ka la tynrah bad pynmynsaw jur ïa arngut ki samla pule kynthei jong ka skulbah.
“Baroh arngut ki samla pule ki la mynsaw jur bad la pynkit noh mar-mar ïa ki sha Nazareth Hospital, ha kaba mynta ki don ha ka Intensive Care Unit (ICU) bad ki dang ïoh ïa ka jingsumar kaba ïai bteng,” ong ka kyrwoh da kaba bynrap ba ka skulbah ka pynrem jur ïa ka jingñiah kali thurmur kaba la ïalam sha katei ka jingjia ba sngewsih.
Haba ïadei bad kane ka jingjia, la ujor ïa ka ejahar, bad la bthah ïa ka bynta ba dei khmih jong ka skulbah ban pynkhreh kloi bad aiti ïa ka kaiphod kaba bniah halor kane.
“Ka NEHU ka kner ïa ka jingkyrshan, ha ryngkat ki jingduwai sha ki samla pule kiba la mynsaw bad ki bahaïing hasem jong ki ha kane ka por. Ka skulbah ka ïakren na ka por sha ka por bad ki longïing jong kitei ki 2 ngut bad ka dang buddien ïa ka jinglong-jingman jong ki,” ong ka kyrwoh.
Ha kajuh ka por, ka skulbah ka kyrpad jur ïa ki paidbah nongshong shnong ban pyndam bad weng noh mardor ïa kino-kino ki dur-khih ne ki dur jong katei ka jingjia aksiden kiba saphriang mynta ha ki rynsan lad pathai ne kiwei pat ki rynsan.
“Ka NEHU ka aiti pura ban ïatreilang bad ki bor jong ka aiñ bad ki bor pynïaid ‘hospital’,” pynkut ka kyrwoh.
