Shillong, Naiwieng 18
Ka jingïakhun hapdeng ka Meghalaya bad ka Manipur ha ka Ranji Trophy 2025-26 ka la jam sha ka jingïakhaid, ha kaba ka resol kaba lah ban mih paw na kane ka jingïakhun kan shong satang ka jinglah ban ïalehkai bha ki rangïalehkai ha kaba kut artad jong kane ka jingïakhun ha ka sngi Balang.
Haba wan ban sdang ïa la ka pali na ka 180/4 wiket, ka Manipur ka la lap ba hap biang baroh ki wiket jong ka hadien ba ka la lah ban kamai 342 ron, kaba wan hadien ba ka Meghalaya ha ka pali wan tied ba nyngkong jong ka, ka la kamai 430 ron bad ban tam kylla da 88 ron.
Ha kaba kut noh artad jong ka sngi kaba lai, ka Meghalaya ka la kamai 49 ron hadien ba ka la shah pynhap noh 1 wiket, bad ïai bteng ban tam biang da kumba 137 ron.
Ha ka jingshisha, na ka liang ka Manipur, ka la pyrshang ba kan jam beit sha ka thong , hadien ba u AL Bashid bad u Priyojit ki la lah lypa ban ïa kamai mar 52 bad 49 ron, hynrei ha ka sngi kaba bud, kine baroh arngut kim shym la lah ban kamai ïa ki ron kiba heh jong ki, hadien ba u Bashid u la ‘run out’ noh ha u Kishan Lyngdoh hadien ba u la kamai 64 ron bad u Priyojit u la shah pynkhyllem noh (lbw) ha u Chengkam Sangma hadien ba u la kamai 71 ron. Nangta u Jotin Pheiroijam u la kynjoh sha ka thong da kaba u la lah ban tied ‘half century’ (86) hashwa ba un ‘run out’ noh da u Akash, bad ha kaba kut u Chengkam, u la ïoh ban khur 2 wiket na ka bynta 50 ron na ki 8 over, u Akash u la ïoh 2 wiket na ka bynta 68 ron bad Aryan Borah u la ïoh 2 wiket na ka bynta 83 ron.
Hadien kane, ka Meghalaya ka la ïoh por tang kumba shi kynta ban sdang ïa ka pali wan tied kaba ar, kaba hangne ka la lap ba duh ïa ka wiket jong u Arien Bonchang Sangma ba u la lah ban kamai 7 ron, hynrei na ka liang Arpit Bhatewara (16 not out) bad Duhan (25 not out), ki pynlong ïa ka Meghalaya ba kan jam lyngba ïa ki kynta ba khatduh jong kane ka jingïakhun.
