Chandigarh, Naiwieng:
Ki BSF ki la lah ban pynduh pyndam ïa 255 tylli ki drone mynta u snem, kiba wan na Pakistan na ka bynta ban khaïi beaiñ ïa u drok Heroin bad ki tiar ïaleh, ong uwei u heh jong ka tnad pahara khappud, Punjab Frontier.
U la ong shuh shuh ba ki BSF ki la pynkhlaiñ ïa ka jingpeitngor ha ka jingwan jong ka aïom tap lyoh hashwa ban sdang ki kam khaïi tuh na shiliang khappud.
Haba ïakren bad ki lad pathai khubor ha Amritsar ha ka lah sngi U Blei, u Inspector General BSF u Atul Fulzele u la kdew ba ka jingïohi ka hiar ha ka por ba don ka lyer, kaba lah ban pyndonkam da ki nongkhaïi beaiñ da kaba pyndonkam da ki Drone.
“Ngi la pynbeit ïa ki jingdonkam ban weng ïa kane ka jingeh. Yn pyndonkam ïa ki tiar peitngor ba kyrpang ha ka por ba don ka jingkahdum jong u lyoh, bad ngin pynneh ïa ka jingpeitngor kaba pyrkhing bha ïa ki jaka ba don harud wah, kaba pynskhem ïa ka kor peitngor jong ngi baroh kawei,” ong u Fulzele.
U la kdew ruh ba ki shipai BSF kin peitngor bha ïa ki briew kiba wan sha ki jaka khappud ban shim ïa ki Drone ba la pynhap na shiliang khappud.
Yn pynlong ïa ka jingkhynra lang da ki shipai BSF bad ki pulit Punjab ha ki surok kiba leit sha ki jaka khappud ban ïada na ka jingkhaïi tuh.
“Ngi leh ïa kane man la u snem bad ngin leh ïa kane ha kane ka kynti ruh kumjuh”, la ong u IG. “Haduh mynta, ki BSF ki la lah ban pynduh ïa 255 tylli ki Drone kiba wan na Pakistan,” la ong u IG.
Khyndiat sngi shwa, ki BSF ki la ïathuh ba ki la lah ban khanglad ïa ki 251 tylli ki Drone.
Ka la ïoh kurup ruh 329 kg u drok, 16 kg u ICE (methamphetamine), 191 tylli ki tiar ïaleh, 12 tylli ki bom kawang kti bad palat 10 kg ki tiar pynbthei haduh ka 14 tarik u Naiwieng mynta u snem.
Ki BSF ki la pynïap ruh ïa lai ngut ki nongwan rung tuh na Pakistan bad ki la kem ruh ïa ki 240 ngut ki nongkhaïi tuh na India bad 19 ngut ki nong Pakistan kiba donkti ha ki kam runar sha shiliang pud, la ong ka khubor.
Ha ka lah sngi U Blei, ki BSF ki la pynbna ba ki la ïoh ban kurup 50 tylli ki kuli 9mm hajan ka shnong Muthiawala ha Ferozepur.
