Mawkyrwat, Naiwieng 18
Ka ïingbishar u Special Judge (POCSO) ka South West Khasi Hills District ha ka 14 tarik u Risaw, 2025 ka la rai pynrem ïa u Robarness Lyngdoh, 25 snem na Mawmerang uba la leh ïa ka kam sniew pyrshah ïa ka longrynïeng jong kawei ka khynnah kynthei (penetrative sexual assault).
Katkum ka jingïathuh u Superintendent of Police ka SWKHD u Bah B Jyrwa u la ong, ha ka 14 tarik u Rymphang, 2021 ka la don ka jingmudui ejahar na u Nemanbor Lyngdoh bad katkum ka ejahar la ong ba u Robarness Lyngdoh u la leh kam sniew pyrshah ïa ka longrynïeng jong ka para kynthei jong u.
Hadien ba ïoh pdiang ïa ka ehajar, ki pulit ki la kem noh ïa une u briew bad ki la register ïa ka mukotduma hapoh ki kyndon aiñ jong ka POCSO Act, bad hadien ba la dep tohkit pura, la phah noh ïa ka Charge-Sheet ha ka 31 tarik u Lber, 2021 sha ka kashari ban pynlong ïa ka jingbishar.
Hadien ka jingbishar bniah ïa ki sakhi ki sabut, ka Ïingbishar lyngba u Special Judge (POCSO), South West Khasi Hills District, ka la rai pynrem ïa u Robarness Lyngdoh bad pynshitom da kaba set phatok shipor kata lai snem hynriew bnai bad daiñ kuna T.10,000.
Sa kawei ka jingjia, ka ïingbishar jong u Special Judge (POCSO), South West Khasi Hills, ha ka 17 tarik u Risaw, 2025 ka la rai pynrem sa ïa uwei u briew halor ka jingkynnoh ba u la leh kam sniew ïa kawei ka khynnah da kaba set phatok 7 snem bad daiñ kuna T.20,000.
Ki tyllong khubor na u Superintendent of Police, SWKHD u Bah B Jyrwa u la ong ba ha ka 29 tarik u Kyllalyngkot, 2012, u Joyningstar Lyngkhoi u la ujor da ka ejahar pyrshah ïa u Welbestar Langrin bad katkum ka ejahar la ong ba ha ka miet jong ka 27 tarik Kyllalyngkot, 2012, ha ka por kumba 7:00 janmiet u Bah Welbester Langrin u la leh kam sniew pyrshah ïa ka longrynïeng (penetrative sexual assault) bad u la byrngem byrsit ruh da ka jingthmu pynïap ïa ka khun kynthei jong u.
Ha kaba ïadei bad kane ka jingjia, ki pulit ki la register ïa ka case ha thanad Mawkyrwat hapoh ka POCSO Act bad ka Ïingbishar ka la pynshitom da kaba set phatok bad daiñ kuna bad lada kim siew ïa ka kuna ki hap ban shong biang sa shi bnai ha phatok.
