Raipur, Naiwieng:
Ki la don kumba 6 ngut ki lehnoh Maoist, kynthup ïa u Madvi Hidma, uba dei u khlieh jong ka People’s Liberation Guerrilla Army (PLGA) Battalion 1 jong ki Maoist, ki la ïap ha ka jingïasiat bad ki bor pahara ha Andhra Pradesh, Alluri Sitaramaraju distrik, ha ka sngi Ba-ar, ong u heh pulit.
Lait na u Hidma, kiwei pat ki Maoist kiba la shah pynïap ha kane ka jingïasiat, ki kynthup ïa ka kurim jong u Hidma ka Rajakka, ka Chelluri Narayana, u Suresh SZCM, bad u Tech Shankar.
Katkum ka jingïathuh jong ka ophis jong u heh pulit jong ka Alluri Sitarama Raju, ym shym la don ki bor pahara kiba la mynsaw ha kane ka jingkhynra, bad ki jingpyrshang ban wad bniah ki dang ïaid shakhmat ha kane ka thaiñ.
U Sundarraj Pattlingam, Inspector General of Police, Bastar Range, u ïathuh ba katei ka jingïasiat, ka la jia hapdeng ka por 6.30 bad 7 baje mynstep, ha ka jaka khlaw jong ka Maredumilli Mandal.
“Hooid, hynriew ngut ki Maoist ki la shah pynïap ha ka jingkhynra kaba la pynlong da ki tnad pulit bapher bapher ha Alluri distrik,” la ong u Pattlingam.
La ïathuh ba u Madvi Hidma u dei u dkhot CC uba dang khynnah tam ha katei ka seng kaba la shah ñiew beaiñ.
U Madvi Hidma, uba dei u nongshong shnong jong ka Sukma distrik, uba dang sah kum u riewlum uba paw na ka bynta ki Maoist ha Chhattisgarh, la ïathuh ba u dei udkhot uba dang khynnah tam jong ka Central Committee ha kane ka kynhun lehnoh.
U Hidma u dei uba la pawnam bha halor ki kam jong u ha ki katto katne ki kam thombor jong ki Maoist.
Kine ki kynthup ïa ka jingshah thombor ha u snem 2010 ha Dantewada kaba la pynïap ïa 76 ngut ki shipai CRPF bad ka jingshah thombor ha u snem 2013 ha Jhiram Ghati kaba la pynïap ïa 27 ngut ki briew. U la rah ïa ka khusnam kaba T.1 klur ha ka khlieh jong u ha Chhattisgarh.
Kane ka jingïasiat ka dei ka jingïasiat kaba ar kaba jur ha ka distrik hapoh hynriew bnai.
Ha u Jylliew, 2025, lai ngut ki Maoist ïa kiba la tip kyrteng kum u Uday, Aruna, bad u Janu, ki la shah pynïap ha kum kane ka jingkhynra ha kajuh ka thaiñ.
La pyntreikam shuh shuh ïa ki kynhun shipai ha kane ka thaiñ bad haduh mynta la ap ïa ki jingtip ba bniah halor ka jingjia na ki pulit.
