Shillong, Naiwieng 19
Ka kynhun jong ki Executive Member (EM) ka Khasi Hills Autono-mous District Council (KHADC) ha ka sngi Balang ki la hiar sha nongbah Delhi ban ïakynduh ïa ka Myntri ba khmih ïa ka tnad Pla Tyngka ka Sorkar Kmie ka Nirmala Sithara-man na ka bynta ban pynsngew ïa ki jingeh ba kum ka council ka ïakynduh.
Ïa kane ka kynhun jong ki EM la lam khmat da u EM ka Development u Bah Powell Sohkhlet, u EM ka Finance u Bah Seiborlang Warbah, u MDC shu sieh, Bah Matthew Makdoh ryngkat ki ophisar ka KHADC.
Ha kane ka jingïoh ban ïakynduh ïa ka Nirmala Sitharaman, ki EM ki la ïoh ban ïakren halor ki jingdonkam kiba ïadei bad ka jingpyntreikam ïa ki skhim ne projek ba la mang pisa da ka Finance Ministry lyngba ka Fifteenth Finance Commission ba la pynïaid da ka Ministry of Panchayati Raj.
Nalor ka jingpyntreikam ïa ka Fifteenth Finance Commission, u Nongaiktien jong ka Executive Committee, u Bah Powell Sohkhlet hadien ba la ïakynduh ïa ka Myntri, u la ïathuh ba ka jingïakynduh ka long kaba seisoh ha kaba ka la bthah ïa ki ophisar ban wad ki lad ki lynti ban pyllait noh ïa ka pisa kaba sah jong ka Fifteenth Finance Commission bad kumjuh ruh u Bah Powell u la ïathuh ba ka Council ka la kyntu ruh ïa ka Myntri ban ai jingïarap da ka song ba kyrpang na ka bynta ka council na ka bynta ki jingtreikam bapher-bapher ha ka roi ka por ki paidbah.
Hashwa kane, ha ka sngi Ba-ar, ka kynhun ka la ïakynduh ruh ïa u Joint Secretary bad ki ophisar jong ka Ministry of Panchayati Raj kaba dei ka tnad ba pyntreikam ïa ki projek jong ka Fifteenth Finance Commission.
