Nongstoiñ, Naiwieng 19
Ka ophis jong ka Cooperation Department Government of Meghalaya ha ka jingïasnohktilang bad ka Meghalaya Cooperative Apex Bank Ltd Shillong, bad ka Meghalaya Basin Management Agency ha ka sngi Balang kala ïoh ban rakhe ïa ka International Year of Cooperatives kaba dei ruh kum ka dak ka jingkynjoh sha ka 72 snem ka jingshakri paidbah ka society ïa kaba la tip ruh kum ka 72nd All India Cooperative Week Celebration.
Ha kane ka sngi u Bah Methodius Dkhar, Myntri ka Sorkar Jylla u la wan ban ïadon lang kum u kongsan bad la synranlang ruh da u Bah CP Mawkon, Additional Deputy Commissioner ka West Khasi Hills District kum u symbud kongsan kumjuh u Richard Yanthan, IAS, Registrar jong ka Co-operative Society Meghalaya, Shillong bad kiwei-kiwei.
Ïa ka jingïalang la pynlong ha Dorbar Hall ka shnong Mawkhlam Nongpyndeng bad ha katei ka sngi la buh ruh ki ‘stall’ na ki Society bapher-bapher kiba na ka thaiñ jong ka West Khasi Hills District bad South West Khasi Hills bad ka Eastern West Khasi Hills District kiba la wan rah ban die ïa ki umsoh, ki waiñ, ki ashar bad kiwei-kiwei ki jingbam jingdih kiba la shet ne shna hi da ki society.
U Bah Methodius Dkhar haba kren kum u kongsan u la ong, “Ka jingrakhe ka dei ka taïew kaba ngi khmih lynti ïa ka jingïatreilang, ka jingïadonlang bad ba na ka liang ka tnad ka kwah ban pynlong ïa kane kum shibynta jong ka jingïakynduh lang ba ngin ïa ai mynsiem lang iwei ïa i wei bad kumjuh ruh ngi kwah ban pynlong ïa kine ki prokram na ka bynta ba ngin sngewthuh lane kheiñ kor ïa ka jingnoh synñiang jong ki society kaba ki ai ha ka imlang ka sahlang.
U la ong ruh ba ka jingrakhe ïa kane ka sngi ka long ban sngewthuh ïa ka jingdonkam ka co-operative Society ha ka Jylla ne ha ka ri India baroh kawei bad ka phang kaba la buh ha kane ka sngi ka pynsngewthuh ba kumno ban ïeng ha la ki kjat kum ka Ri bad u la ong ba kata kan dei ban sdang na kane ka Jylla kaba dei ruh ka thong jong ka Jylla da kaba pyndonkam ïa ki sap bapher-bapher kaba don.
