Nongpoh, Naiwieng 19
Ha kawei ka jingjia tyngkhuh kali ha ka step sngi Balang ha ka surokbah National Highway 6 ha 12 Mer Byrnihat, uwei u nongñiah kali Alto ula khlad noh hashen katba ar ngut kiba shong hapoh ka Toyota Innova kila ngat ha ka jingmynsaw jur.
Katkum ka tyllong khubor ba la ïohlum, la ïathuh ba katei ka jingjia ka dei ha ka por kumba 10:30 mynstep ha kaba katei ka kali Maruti Alto kaba don ïa u number ML10-C-7094 katba ka dang kiew sha ki thaiñ Byrnihat hapdeng ka jingpynher sted kaba palat, kala leit ban jam na shilliang sha shilliang jong ka surokbah bad leit ban tynrah beit-beit ïa katei ka Toyota Innova kaba don ïa u number ML10-S-0011 kaba dang ïaid na ka liang kaba pyrshah.
La ïoh jingtip ruh ba u nongñiah ka kali Maruti Alto, u dei uba la tip kyrteng kum Helin Lyngdoh bad u don tang marwei hapoh katei ka kali, katba ïa ka Toyota Innova la ñiah da u Manish Kumar Jha ryngkat bad ar ngut ki briew kiba shong hapoh.
Na ka liang ki pulit kiba la wan poi mar-mar tang mar ïa ïoh jingtip halor katei ka jingjia, ki la pynkit noh ïa u nongñiah ka kali Maruti Alto sha Byrnihat CHC haba ki doktor ba dei khmih kila pynbna ba u la dep ban khlad hashwa ban poi sha ka jaka ai jingsumar, katba ïa ki ar ngut kiba shong ha ka Toyota Innova kiba la mynsaw jur, la pynkit noh sha ka jaka ai jingsumar ka nongbah Guwahati.
