Shillong, Naiwieng 19
Ka lympung ïalehkai First Division Football League 2025 ba la pynïaid ka Tyrsad Area Sports Association (TASA) ka la nangjam shaphrang ha ka sngi Balang ha madan Mawlum, Tyrsad ha kaba ka Perkseh SC bad ka Mawponghong SC ki la khur ïa ki jingjop.
Ha kane ka jingïalehkai kaba nyngkong, ka Perkseh ka la pynliem noh ïa ka Rangshangkham SC bad ïa kane ka shi kol la thep da u Bansamlang Nongbet ha ka minit kaba 30 jong ka kylla step.
Haba phai sha kawei pat ka jingïalehkai, ka Mawponghong ka la jop da 1-0 kol ïa ka Kyrphei SC bad ïa kane la thep da u Precious Jala ha ka minit kaba 72 jong ka kylla miet.
Kane ka synjuk ka la sdang ruh ïa ka Second bad Third Division ha ka sngi Ba-ar ha katei kajuh hi ka madan.
Ha ka jingïakhun jong ka Second Division, ka Nongmadan SC ka la pynliem noh ïa ka Mawliehpoh SC da 3-1 kol. Ïa kine la thep da u Riston Umdor ha ka minit kaba 35 , kumjuh u Operson Mawlong (40) bad u Welmanstar Rani (45). Katba na ka Mawliehpoh la thep da u Gemous Parïong (52).
Ha ka Third Division, ka Mawtangor SC ka la jop da 2-0 kol ïa ka Mawpalong SC. U rangapkol ka Mawpalong u Banteilang Marbaniang u la kum thep hi ha ka minit kaba 27 bad ïa kawei pat la thep da u Ristarlang Pdahsiej (38).
Ha kawei pat ka jingïakhun, ka Umsawmat SC ka la jop da 2-1 kol ïa ka Wahumlawbah SC. Na ka Umsawmat la thep da Ksanborlang Kharshandi ha ka minit kaba 8 bad u Kenny Manbhasur (21), katba na ka Wahumlawbah la thep da Tikshonstar Kharshiing.
Kane ka lympung kan bteng biang ha ka 22 tarik (sngi Saitjaiñ) ha ka jingïalehkai ha ka Third Division kan long hapdeng ka Nongthymmairum SC pyrshah ïa ka Phanñiewlahnemg SC, kumjuh ka Young Boys SC ïa ka Wahnongkseh SC. Katba ha ka Second Division kan long hapdeng ka Nongwah SC ïa ka Phanñiewlahrum SC.
