Shillong, Naiwieng 19
Ka KSU War Jaiñtia Circle ka la kyntu ïa kino-kino ki runar kiba pynpra dusmon ïa u motdur u Jisu Khrist ha Amlarem, West Jaiñtia Hills District ki dei ban leit pyndem ïalade hakhmat ki pulit jong ka Amlarem.
Kane ka jingkyntu ka KSU ïa ki runar ka dei myn ha ka 18 tarik mynta u bnai Naiwieng 2025, hadien ba ka la leit jurip ïa ka jingshah pynpra dusmon u durmot u Jisu Khrist ha Syiem Jingsuk Parish Amlarem, West Jaiñtia Hills District kaba la jia ha ka 13 tarik mynta u bnai.
Ka seng ka la pynrem jur halor kane ka jingleh riewkhlaw ki runar kiba pynthohbria bad pynjahburom ïa ka thaiñ War Jaiñtia bad kyntu ruh ïa ki bor ka aiñ ba kin pynkloi ban wad bad tohkit bniah ïa kiba donkti bad pynngat ïa ki katkum ki kyndon jong ka aiñ.
Kumjuh ka seng ka la maham ba kan ïai peitngor bad wad lang ïa ki runar ba donkti ha katei ka kam khnang ban ïoh leh ïa kaba donkam.
Ka KSU War Jaiñtia Circle ka la pynsngew ruh ba ka thaiñ War Jaiñtia ka dei ka thaiñ kaba ym ju don kata ka jingsngewpher niam ne sngewpher jaitbynriew hynrei naduh mynshwa haduh mynta ki don beit hapdeng ka jingïaieid bad ka jingburom markylliang para maki, kumta katei ka jingleh dusmon da ki briew ba donkti, ka seng kam lah ban pdiang da lei lei ruh.
Ha kajuh ka por ka seng ka kyrpad ïa ki paidbah ka thaiñ ba kin long kiba ïai pynneh ïa ka jingshongsuk, ka jingshong shngaiñ, kumba ka Ri War Jaiñtia hi ka long kawei na ki thaiñ hapoh Ri Khasi Jaiñtia kaba dang don hapdeng ka jingshongsuk shongshngaiñ ha baroh ki liang. Kane ka long katkum ka kyrwoh ba la phah da u samla Lop Stevenson Khonglah uba dei u President bad Michel Palatini Mukhim General Secretary.
