Shillong, Naiwieng 19
U MLA barim jong ka South Tura u John Leslee K Sangma u la leit phai biang bad pynïasoh ïalade sha ka Congress hashwa ka ilekshon sha ka Garo Hills Autonomous District Council (GHADC) ka ban long ha u snem 2026.
Haba pdiang sngewbha ïa u John Leslee ha ka sngi Balang, u President ka Meghalaya Pradesh Congress Committee (MPCC) u Bah Vincent H Pala u la ong, “Ngi sngewkmen ban pdiang sngewbha ïa u John Leslee K Sangma sha ka ïing ka sem jong ka Congress. Ka jingwan phai biang jong u, ka long ka khubor kaba jam sha ka BJP bad NPP kiba ïatreilang bad ki kam politik jong ki ban wanrah ka jingpynïapher bad leh klet ka la nang khyrngiat ïa ka thaiñ rilum Garo sha ka jingeh. Ka jingwan phai jong u ka dei ruh ka sienjam ba ka Congress kala khlaiñ biang mynta. Ka jingshemphang jong u bad ka jingïajan jong u bad ki paidbah kan nang pynkhlaiñ shuh-shuh ïa ka Congress ha rilum Garo”.
U John Leslee K Sangma uba la don teng bad ka United Democratic Party (UDP), u dei u nongmihkhmat paidbah uba ïoh bha ka burom bad uba kren na ka bynta ka hok bad ka jingangnud jong ki rilum Garo.
Hadien ka jingïasyllok bad ka jingïapyrkhat bad ki riew rangbah, ki nongkyrshan, bad ki kynhun bapher-bapher, u John Leslee K Sangma u la jied ban leit phai biang sha ka Congress da kaba kam ba ka Congress ka dei ka rynsan saiñ pyrthei kaba tang ma ka kaba dang ïai bteng ban ïeng skhem halor ki jinglong jong ka synshar paidbah bad ki hok jong ki jaitbynriew.
Haba ïakren bad ki nongïalam ka MPCC, u John Leslee K Sangma u la pynpaw ïa ka jingsngewkhia kaba jur halor ka jingeh kaba la nang jur ha rilum Garo bad u la kdew ba ki samla ki ïakynduh ïa ka lawei kaba dum, da ka jingbym don kam don jam, ka jingduh jingkyrmen, bad ki lad ki lynti ban kyntiew para briew kila nang duna.
