Shillong, Naiwieng 19
U wei u rangbah briew uba na ka shnong Madan Langning, u la shah pynïap ha uwei u rangbah briew da kaba shah dung da ki kynja tiar ba nep ha shyngkup ka ïingsah jong u, ha kaba ki paidbah nongshong shnong ki la pynlong da ka jingïaid paidbah ban pynrem jur bad dawa sdien phasi ïa u ba donkti ban pynïap.
Kane ka jingshah pynïap ka dei kaba la jia ha ka 9 tarik u Naiwieng 2025 ha ka por kumba 6 baje janmiet ha shyngkup ka ïingsah jong uba shah pynïap.
Ïa u rangbah ba shah pynïap la tip kyrteng kum u Bah Bhimsing Lyngdoh Nongbri uba la 46 snem ka rta, uba dei u kurim jong ka Kong Mirshalin Lawai bad u nongpynïap u dei u ba la tip kyrteng u Bah Libokstar Suting.
Halor ka jingjia shah pynïap u Bah Bhimsing Lyngdoh Nongbri, ka Joint Action Movement of Mawkynrew Constituency (JAMoMC) ha ka jingïatreilang bad ka Federation of Khasi Jaiñtia & Garo People (FKJGP) ki la pynlong ïa ka jingïaid paidbah ha ka 19 tarik Naiwieng 2025, ha kaba da ki hajar ngut ki nongshong shnong, ki khynnah skul ki la mih paidbah ban rah plakad ban pynrem jur bad dawa ba dei ban sdien phasi shi syndon ïa u briew u ba donkti ban pynïap ïa u Bah Bhimsing Lyngdoh Nongbri.
Hadien ka jingïaid paidbah ba la sdang na Khim Kharai bad pynkut ha Lhon, ka la don ka jingïalang paidbah ba la ïoh jingkren da ki nongïalam ka JAMoMC ki nongïalam sengbhalang bapher-bapher ha kaba ki la pynrem jur ïa ka jingshah pynïap u Bah Bhimsing bad dawa ba ki bor jong ka aiñ ki dei ban shimkhia haba ïadei kane ka jingjia ban ai ka jingpynshitom kaba tyngeh bad dawa ba dei ban sdien phasi shi syndon ïa u Bah Libokstar Suting.
U Bah Kopstar Lawai kynum trai jong u Bah Bhimsing, haba kren ha ka jingïalang u la ïathuh ba ha ka janmiet 9 tarik, u Bah Libokstar Suting u la wan ha ïing ban khot ïa u Bah Bhimsing bad u la shim ïa ka jingim jong u, ha khmat ka khun kynthei bad ki khun rit.
U la ïathuh ba u Bah Bhimsing u dei uba don 12 ngut ki khun bad na kine tang lai ngut ki dei kiba la kham heh, hynrei ki 9 ngut ki dei kiba dang rit ha ka rta, u la ong ba ka jingduh ïa u kpa ka ïing ka pynduh mynsiem shibun ïa ka ïing ka sem bad ka buh jingeh kumno ban pyndap pynbiang ïa ka ïing ka sem.
U la ong ba, kum ka ïing ka sem ka shaniah ha ki bor jong ka aiñ ban ïoh ïa ka jingbishar kaba khuid bad ban tip ïa ka daw balei ba utei u runar u la shim ïa ka jingim jong u kpa ka ïing jong ki bad pynpaw ba kum ka ïing ka sem ka dap da ka jingsngewsih kthang halor ka jingshah dkhat jubor ka jingim jong u kpa ka ïing.
