Shillong, Naiwieng 19
Ka Ryntih SC ka la khur biang ïa ka jingjop kaba ar ha ka SSA 1st Division Football League 2025, hadien ba ka la lah ban pynliem noh ïa ka Mawkhar SC da 2-0 kol ha ka sngi Balang ha SSA Stadium, First Ground, Polo.
Da kane ka nam jop ka Ryntih ka la lah ban pynskhem ïalade ban ïai sah ha kane ka lympung na ka bynta ka aïom ka ban wan da kaba ka la kamai 7 poiñ ha ki khyndai sien ïakhun, katba ka Nongrah (5 poiñ) ka la hap ban synran lang ïa ka Lawsohtun (2 poiñ) ban ïahiar noh shaka Second Division ha ka aïom ka ban wan.
Kumba ka paw ka Ryntih ka la i duh jingkyrmen ban dangïai neh ha kane ka lympung namar ka la mad haduh hynriew sien ki jingshah rem ryngkat ka Nongrah bad ka Lawsohtun. Hynrei ha kine ki ar tylli ki jingïalehai kiba khatduh ka la wanphai da ka jingjop kata ïa ka Nongrah da 2-1 kol bad kumjuh mynta ka sngi sa ïa ka Mawkhar. Ïa kine ki kol ha kane ka sngi la thep da u Banlam Nashwa Kharbhih ha ka minit kaba 10 bad u Russel C L Nongkynrih (73).
