Shillong, Naiwieng 19
U nongmihkhmat ka UDP na Khliehriat, Bah Kyrmen Shylla ha ka Sngi Balang u la ong ba kam don kano-kano ka jingpyrshah ïa ka jingtohkit lada ki paidbah ki sngew ba ka pisa kam pat poi sha kito kiba la thmu ban ïoh jingmyntoi.
U la kren ïa kane halor ka jingdawa jong ka Voice of the People Party (VPP) ban don da ka jingtohkit kaba laitluid halor ka jingpyntreikam ïa ka skhim MLA ha ka Jylla.
“Ha ka jingshisha, haba phai sha ki skhim jong ngi, kiba la dei ban pynpoi sha ki paidbah ha ki konstitwensi jong ngi…ka jingsngew shimet jong nga ka long ba kano-kano kaba dei ka hok jong ki paidbah, ka hap ban leit sha ki. Hynrei lada ngi sngew ba ym shym la pynpoi, ka Sorkar bad ki paidbah ki don ka hok ban dawa ïa ka jingtohkit kaba laitluid ne kano-kano ka jait jingtohkit – ngi long kiba pdiang sngewbha na bynta kata,” ong u Bah Kyrmen uba dei ruh u nongaibuit ka tnad Mining & Geology haba kren sha ki nongthoh khubor.
“Khamtam eh na ka bynta jong nga, ngan sngewtynnad ba ki briew kin tip ïa kaei kaba nga la leh bad ba ki skhim ki poi sha ki ha ka por kaba biang. Khlem pep, ka jingpynslem teng-teng ka ju jia hynrei kam dei kaba la leh khnang,” u la bynrap.
Haba kylli, u Bah Kyrmen u la ong, “Ym don eiei ban buhrieh. Lada ym don eiei ban buhrieh, ka RTI ka dei kaba biang eh ha jaka ka jingtohkit. Ka long kaba suk bha – pan RTI na ka ophis BDO bad phin ïoh lut baroh.”
“Baroh ka pisa ka dei jong ki paidbah. Lada don kiba artatien ïa nga ne ïano-ïano, ka Sorkar ka don ka hok ban wad ïa kaei kaba jia. Kumta lada don ka jingartatien, ngim dei ban iehnoh ïano-ïano ruh,” u la ong.
U Bah Kyrmen u la ban biang ba ka skhim MLA ka mang T.2.5 klur sha kawei ka konstitwensi man la u snem bad ban jur ba ka pisa ka dei ban poi sha ki paidbah, bad ym ban kynriah shawei pat.
Shuh shuh u la kam ba ki ju don ki jingpynslem teng-teng hynrei u la pynskhem ïa ka jingkular jong u ban pyntikna ba ïa ka pisa la pyndonkam hapoh ka samoi ba 5 snem.
