Kolkata, Naiwieng:
Ka Election Commission ka thmu ban pyntreikam ïa ki rukom pynshisha da ka Artificial Intelligence (AI) ha ka por ba dang ïaid shakhmat ka Special Intensive Revision (SIR) ïa ki thup nongthep vote ha West Bengal khnang ban khanglad ïa ka jingpynrung ïa ki nongthep vote thok ne kiba la khlad noh, ong uwei u heh ophisar ha ka sngi Ba-ar.
Da kaba bishar bniah ïa ki jingïahap dur ha kylleng ki dur ha ka thup jingtip jong ki nongthep vote, ka AI System kan ïarap ban ithuh ïa ki briew shimet kiba la pynrung kyrteng ha ki jaka bapher bapher.
“Ngi shim ïa ka jingïarap jong ka AI namar ka jingkiew jong ki jingujor ha kaba ïadei bad ka jingpyndonkam bakla ïa ki dur jong ki nongthep vote, khamtam ïa ki dur jong ki nongbylla sngi,” la ong u heh sorkar ha ka lad phah khubor.
“Yn pyndonkam da ka teknoloji ban pynïahap ïa ka dur khmat kaba pyndonkam da ka AI ban lap ïa ki khep ha kaba kajuh ka dur jong u nongthep vote ka paw ha ki jaka bapher bapher ha kylleng ki thup kyrteng,” u la ong.
Kane ka sienjam ka la long kaba kongsan bha hadien ka jingkiew jong ki jingujor ba la pyndonkam bakla ïa ki dur jong ki nongbylla sngi ha ka por ba pynrung kyrteng nongthep vote, u la ong. Hynrei u heh sorkar u la ong ba ki Booth-level Officers (BLO) kin dang bteng ban leh ïa ka bynta ba kongsan ha ka jingpynshisha.
“Ka AI kan ïarap ïa ka jingpynshisha. Hynrei wat hapdeng ka jingpyndonkam ïa ka teknoloji, ka bynta jong ki BLO kan dang long kaba kongsan. Yn donkam ïa ki ban pynlong ïa ka jingleit jngoh ïaman ki thliew ïing ban shim beit ïa ki dur jong ki nongthep vote,” u la ong.
Wat haba ki Agent kiba don ha ka kyrdan jong ki Booth-level-Agents (BLA) ki ai ïa ki phorm ba la pyndap, ki BLO ki dei ban leit jngoh hi dalade ïa ka ïing ban pynshisha ïa ka jingsoi.
“Ki BLA kin ïoh ruh ïa ki jingthoh kti na ki nongthep vote kiba pynthikna ba la pyndap ïa ki phorm ha ka jingdon jong ki,” la ong u heh sorkar. U la pynksan ruh ïa ki kyndon ba pyrkhing bha jong ka jingkitkhlieh.
“Lada lap ïa uno uno u nongthep vote thok ne uba la ïap hadien ba la pyndep ïa ka jingkheiñ bad pyndap ïa ka phorm, ka jingkitkhlieh kan shong ha u BLO jong ka jaka thep vote ba ïadei,” u la bynrap.
