Shillong, Naiwieng 19
U Symbud Myntri Rangbah ka Jylla ba khmih ïa ka tnad Transport bad kam pynroi sor, Bah Sniawbhalang Dhar ha ka Sngi Balang u la leit ban jngoh ïa ki arngut ki samla pule ka North Eastern Hill University (NEHU) kiba dang shah sumar ha ka Intensive Care Unit (ICU) jong ka Nazareth Hospital hadien ba ki la shah tynrah ha kawei ka kali kaba la pynher sted hapoh phyllaw jong katei ka skulbah.
U Bah Dhar u la pynbna ruh ïa ka rai jong ka Sorkar ban pyntikna ha ka ban siew lut ïa baroh ka jinglut-jingsep haba ïadei bad ka jingsumar na ka bynta baroh arngut kitei ki samla pule – Daritngen Pohdukhei bad ka Stephanie Shadap.
“Ka dei ka jingjia kaba shyrkhei bad kaba sngewsih shi kat dei,” la ong u Bah Dhar haba kren sha ki nongthoh khubor.
“Ki bahaïing hasem ki la pyntip sha ka Sorkar, bad ka dei ka kamram jong ka Sorkar ban peit bniah ïa kane ka kam, khamtam haba ka ïadei bad ki khun samla jong ngi,” u la ong.
U la bynrap, “Ka jinglong-jingman jong kawei na kitei ki samla mynta ka la kham manbha katba kawei pat ka dang shitom jur.”
Haba kylli, u Bah Dhar u la ong, “Ka Sorkar ka la rai ban pynlut na lade ïa ka jinglut-jingsep haba ïadei bad ka jingsumar na bynta kine baroh arngut ki samla pule.”
U la kdew ruh ba lah ban phah sumar ïa ki shabar ka Jylla da kaba ong, “Lada ym lah ban sumar ïa ki hangne hapoh ar-lai sngi, ka Sorkar kan sa phah ïa ki sha ki ‘hospital’ shabar ka Jylla.”
U Symbud Myntri Rangbah ka Jylla u la pyntip ba ki pulit ki la kem ïa u briew uba shah kynnoh donkti ba la tip kyrteng kum u Parmen M. Sangma – u nongap pahara ka NEIGRIHMS – uba donkti ha katei ka jingjia aksiden.
“Ki don ki bynta bapher-bapher, bad ka aiñ kan shim la ka jong ka lynti. Ngi shimkhia bha ïa kane ka jingjia na ka liang ka Sorkar,” u la ong haba pynpaw ïa ki jingduwai bad jingïatylli jong ka Sorkar Jylla sha kine ki samla pule kiba la mynsaw bad sha ki bahaïing hasem jong ki.
Katei ka jingjia ba shyrkhei ka la jia ha ka Khyrdop ba 2 (NEHU) ha ka janmiet jong ka Lah Sngi U Blei.
Na ka liang ki pulit ka Jylla, ki la pynngat mukotduma thmu pynïap pyrshah ïa u Parman, ha kaba ka kaiphod na ki doktor ka pynpaw ba u la buaid ha ka por ba jia katei ka jingjia aksiden.
U SP ka East Khasi Hills, Bah Vivek Syiem u la ban jur ba kane kam dei ka kam ïatyngkhuh kali kaba malu-mala bad ka donkam shuh-shuh ïa ka jingtohkit kaba bniah ban lap ïa ki jinglong-jingman haba ïadei bad katei ka jingjia.
Shuh shuh ki dur-khih CCTV ki pyni ba katei ka kali ka la tur sted sha kitei ki samla pule, kiba ïaid lynti ha surok. Hashuwa kata, katei ka kali ka la leit tynrah nyngkong eh ïa kawei ka ‘Scooty’ bad nangta ïa ka khyrdop.
