Patna, Naiwieng:
U Nitish Kumar, u la bamsmai kum u Myntri Rangbah ka Bihar- ha ka Gandhi Maidan ba pawnam jong ka Patna, ha ka sien kaba shiphew kaba la pynjlan ïa ka rekod – ha ka step jong ka sngi Palei, kaba pynkut ïa ka jingjop kaba khraw ha ka ilekshon sha ka ïingdorbar thawaiñ jong ka taïew ba la dep.
U heh nongïalam jong ka Janata Dal United, uba la shah kyntait ha ki nongkynthoh jong u, ba u la tymmen palat bad um bit shuh ban shim ïa ka bor synshar, u la shah rkhie hadien ba ka seng jong u, ka la jop 85 na ki 243 tylli ki konstitwensi jong ka jylla, ban ïoh bor ïalade bad ïa ka paralok ba kongsan jong ka, ka Bharatiya Janata Party, sha ka jingjop kaba khraw; ka National Democratic Alliance kaba la ïalam da ka BJP ka la jop 202 tylli ki konstitwensi.
Ka prokram ha Gandhi Maidan ka la long ruh kum ka jingpyni ïa ka bor na ka bynta ki nongïalehkai pyrshah jong ka NDA, ka jingpynkynmaw ïa ka jingjop kaba shyrkhei jong ka; lait na u Myntri Rangbahduh ka ri u Narendra Modi, ki Myntri Rangbah na ki jylla ba la synshar da ka BJP bad na kiba la synshar da ki paralok.
Bad tang hadien khyndiat por jong ka prokram u Myntri Rangbahduh u la buh ïa ka khubor ai khublei ha ka rynsan X; “Ka jingkyrkhu kyrdoh jong nga ïa baroh kiba la shim smai kum ki Myntri ha ka sorkar Bihar. Kane ka dei ka kynhun kaba phylla, kaba don ki nongïalam kiba aiti lut ki ban rah ïa ka Bihar sha ki kyrdan kiba thymmai…” u la ong.
U Nitish Kumar – uba ka jingim slem jong u, ki kynthoh ki nongkynthoh, ka long kaba la pynkhih da ka jinglah ba phylla ban neh ha ka bor da kaba pynlong biang ïa ki jingïateh lok ha ka por ba ki ïaid – u la long lypa u Myntri Rangbah u ba phra uba la shakri slem tam bad, lada u shakri ha kane ka samoi, un long u Myntri Rangbah uba la shakri slem tam haduh mynta, da kaba tam ïa u nongïalam jong ka Sikkim, u Pawan Chamling da 24 snem.
La pynsmai ruh ïa 19 ngut ki MLA, kiba sdang naduh ki nongïalam ka BJP, u Samrat Choudhary, u Vijay Sinha, bad u Dilip Jaiswal, bad kin long ka tynrai jong ka sorkar thymmai, ha kaba pynleit jingmut ha ki khmat kiba la shemphang.
U Choudhary bad u Sinha, kum ka nuksa, ki dei ki Symbud jong u Nitish Kumar ha ka jingsynshar ba mynshwa bad ki lah ban shimti biang ïa kita ki kam sa san snem, bad u Jaiswal, u la long tang khyndiat por kum u Myntri ka Revenue.
La pynbam smai ruh ïa ki nongïalam ka BJP u Sanjay Kumar Singh, u Pramod Kumar, bad u Lakhendra Raushan; u Pramod Kumar mynshwa u la long kum u Myntri ka tnad Law, Sugarcane bad Art and Culture jong ka Bihar.
Ka BJP ka la buh ruh ïa u Rama Nishad, u Narayan Prasad, u Surendra Mehata, u Arun Shankar Prasad, bad u Sanjay ‘Tiger’ Singh, bad ka seng ka la buh kyrteng ruh ïa u nongsiat ba ju don ha ka jingïatynjuh bor bad uba la long MLA arsien u Shreyasi Singh; ka nongjop takma ksiar ha ka Commonwealth Games kaba la 34 snem ka la bat ïa ka Jamui konstitwensi jong ka kum ka jingkiew kyrdan.
La pynbam smai ruh ïa u nongïalam rangbah u Ram Kripal Yadav, uba kham mynshwa bad ka Rashtriya Janata Dal bad ka JDU, bad uba la shakri ruh kum u Myntri ka sorkar pdeng bad kum u MP jong ka Lok Sabha, kumjuh ruh u Myntri barim ka tnad Roadways, u Nitin Nabin.
Da ki 14 tylli ki khmat, ka BJP, kaba la bat tang khyndiat ïa ka jinglong ‘para rangbah’ jong ka halor ka JDU hadien ba ka la jop 89 tylli ki konstitwensi, kan shim ïa ka bhah kaba heh tam ha kane ka por. Ka Janata Dal kan don 6 tylli ki khmat.
Ïa kane ka thup jong ka JDU la lamkhmat da u Bijendra Prasad Yadav, u Shrawon Kumar, u Vijay Kumar Chaudhary, bad u Ashok Choudhary.
U Yadav u la long u Myntri ka tnat Energy bad u Kumar kum u Myntri na ka bynta ka Rural Development, katba u Chaudhary ba lamkhmat ïa ka Water Resources Ministry bad ïa ka Rural Works Development.
Kumjuh ruh la pynrung biang ïa u Mohd Zama Khan, uba dei u Myntri barim ka Minorities Welfare.
U Leshi Singh uba la long MLA la san sien jong ka JDU, u Myntri barim Consumer Protection Minister; Myntri barim ka Social Welfare Minister Madan Sahni; bad u Sunil Kumar, uba la long MLA la ar sien na ka Bhore konstitwensi ruh ki la shah weng noh.
Lai tylli ki seng barit ba la ïatreilang, ka Janshakti Party jong u Chirag Paswan, ka Hindustan Awam Morcha jong u Myntri Rangbah barim ka jylla, u Jitan Ram Manjhi, bad ka Rashtriya Lok Manch ba ïalam da u Upendra Kushwaha, ki la ïoh mar kawei ka jaka shong.
Na ka RLM bad ka HAM, la pynsmai ïa ki khun jong ki heh jong ka seng, u Deepak Prakash bad u Santosh Manjhi. Baroh arngut ki dei ki dkhot jong ka Dorbar Thaw Ain.
U Prakash, un dei u Myntri ba nyngkong eh, katba u Manjhi, u la shakri shipor kum u Myntri ka tnad pyntip bad ka tnad pynneh pynsah ïa ki jingjia ba sngewsih.
