Shillong, Naiwieng 20
Ka lahduh jong ka pyrthei ka Minakshi Hooda ka la khur ïa ka takma ksiar ha ka kyrdan ïakura kaba 48kg jong ka World Boxing Cup finals 2025 hadien ba ka la jop da 5-0 ïa ka Fozilova Farzona kaba na Uzbekistan ha ka sngi Palei ha Greater Noida.
Ka Minakshi kaba la khur ïa ka takma ksiar ha ka World Championship kham hashwa, ka la lah ban pyni ïa ka mynsiem ïakhun pyrshah ïa katei ka nongïakura kaba na Uzbekistan na ka bynta ban jop da 5-0.
Haba pynpaw sha ki lad pathai khubor hadien ka jingjop, ka Minakshi ka la ong, “Ka long kaba suk ban long ka nongjop ha ka pyrthei, hynrei ka long kaba eh ban pynneh ïa kata ka kyrdan kaba hakhlieh duh.”
Haba pynpaw halor ka jingïoh ban khur ïa katei ka takma ksiar ha kane ka lympung kaba la long ha India, ka Minakshi ka la ong, “Nga la sngewtynnad shibun ban ïashim bynta namar ba ka la jia ha India. Ka jingkyrshan jong ki paidbah hangne ka long kaba phylla, bad nga sngewkmen ba nga lah ban jop sa kawei pat ka takma ksiar na ka bynta ka ri jong nga.”
Ha kawei pat ka liang ka Preeti Pawar ka la khur ruh ïa ka takma ksiar ha ka kyrdan ïakhun kaba 54kg, hadien ba ka la lah ban pynliem ïa ka Sirine Charaabi kaba na Italy da 5-0 ha ka phainal. “Nga la wanphai biang, bad nga la nangkhlaiñ shuh shuh. Ngan ai ïa kaba bha tam ha ki por ban wan,” la ong ka Preeti hadien katei ka jingïalehkai phainal.
Ka la pynpaw ruh halor ka jingangnud na ka bynta da kawei pat ka thong ha ka jingim jong ka. “Ki don ki lympung ïalehkai Asia Games bad Commonwealth Games ki ban sa long ha u snem ban wan, bad ka Asia Games sa shisien pat kan long ha u snem 2026. Ka thong kaba hakhmat eh ka long na ka bynta ka LA 2028. Nga dangpynkhreh pura na ka bynta kata,” ka la bynrap.
Kumba ka paw ka India ka la khur ïa ka ka hat-trick ha katei ka lympung, ha kaba ka Arundhati ka la khur ar tylli ki takma bad ka takma ksiar ha ka phainal jong ka Boxing Cup ha ka kyrdan ïalehkai kaba 70kg da kaba pynliem ïa ka Zokirova Aziza kaba na Uzbekistan da 5-0.
“Ngam lah ban pynpaw da ki kyntien haduh katno ka long kaba eh ban wanphai biang na ka jingmynsaw. Nga la ïaid lyngba shibun ki jingeh ha ka bor pyrkhat ha kine ki snem shiteng ba la dep,” la ong ka Arundhati.
“Ha kane ka kynti nga kwah ban leh ïa kaba bha tam namar ba nga dangïalehkai hadien shi snem san bnai. Ka dangdon khyndiat ka jingpang, hynrei nga la lah ban ïalehkai katba lah,” ka la bynrap.
