Shillong, Naiwieng 20
U Symbud Myntri Rangbah ba khmih ïa ka tnad Transport, Bah Sniawbhalang Dhar u la pyntip ba ka Sorkar ka la pynkhreh ban khot tender biang da kawei na ka bynta ka projek ban shna pynheh ïa ka Shillong Airport.
“Ngi la pynkhreh ban pynlait noh ïa ka tender. Tang mar syn dep aiti ïa ka tender, ka kam kan sa sdang noh. Ka dei ban long mynta u snem,” ong u Bah Sniawbhalang haba kren bad ki nongthoh khubor ha ka sngi Palei, bad bynrap ba ka tender ba khot kham shuwa la hap ban pynduh noh namar ki katto katne ki jingeh.
Katkum ki kyndon bala pynsngew da ka Airport Authority of India (AAI), kiba ïoh ïa ka kam kin ïoh por 18 bnai ban pyndep ïa ka projek naduh ka sngi ba aiti ïa ka work order.
“Ka kyndon kaba ki pyntip sha ngi ka long ba naduh ka sngi ba aiti ïa ka work order, ka por ban pyndep ïa ka projek ka dei 18 bnai,” pynshai u Bah Sniawbha.
Kane ka projek, ka dei kaba la mang T.119.44 klur bad ka kynthup ïa ka jingpynjrong ïa ka runway ba 571meter (2400 m baroh lang), pynheh ïa ka terminal building bad apron, bad ki jingtei kiba donkam ban lah pynïaid ïa ka liengsuiñ A-320.
Kham hashuwa, ka Sorkar Jylla kala mynjur ban thied ïa ka jaka ba 11.75 akar ha ka dor ba T.72.17 klur.
Haba ïadei bad ka Baljek Airport, u Bah Sniawbha u la ong, ka jingïajurip lang hapdeng ka AAI bad ka Sorkar Meghalaya ka dang sahteng ban ithuh bad thied shuh-shuh ïa ki jaka ba donkam.
“Ngi dang ap ïa ka jingïajurip lang. Ngi donkam ïa ki riew shemphang na ka AAI ba kin wan bad pyni ïa ka jaka kaba dei hashuwa ba ngin thied ïa ka jaka,” u la ong haba jubab ïa ka jingkylli ba ka Sorkar kala kyrpad ban mang T.50 klur na ka bynta kane ka projek.
U Bah Sniawbha u la ban jur ba ka jingsiew kam dei satia ka jingeh hynrei, ka dei ka jingdonkam ïa ki riew shemphang ka AAI ban pynthikna ïa ka jaka kaba dei ban pynheh ïa ka Kad.
