Chennai, Naiwieng:
U MP ka Rajya Sabha, u Kamal Haasan, ha ka sngi Ba-ar, u la jubab halor ka jingshah kynthoh, halor ka rai jong u, ban ïatreilang bad ka DMK, hadien katto katne bnai, ba u la hiar thma ïa katei ka seng, ha ka por ïalap ilekshon.
Ka durkhih ïalap ilekshon ba kham mynshwa jong u, ha kaba u btet ïa u Remote jong ka TV ban ai dak ïa ka jingkyntait ïa ki jingpynbna saiñpyrthei, ka la paw biang ha ki Social Media, ha kaba kiba bun ki buh jingkylli ïa ka jingkylla ha ka saiñpyrthei jong u.
Haba kren halor ka jingshah kynthoh, u Kamal u la ong ba ka jingïatylli ka dei ka rai kaba la thmu ban ïada ïa ka hok jong ka jylla bad ban khanglad ïa ka jingkiew jong kaei kaba u la khot “ka jingsynshar donbor.”
U Kamal u la ong ba bun ki kylli balei u ïasoh bad ka DMK haba kham mynshwa u la kyntait ïa ki da ka dak. “Kumba nga la ong, ka hok ban shah kynthoh ka don ha ka synshar paidbah,” u la kdew.
Haba pynshai ïa kane ka dak ha ka durkhih ba paw pyrthei jong u, u la ong, “Nga la bret ïa u Remote kaba uwei pat u la shim bad nga la phet noh. Hynrei u Remote u dei ban don bad ka Jylla. Ngi don ka jingmut ba wat ka Education ruh ka dei ban don bad ka jylla. Kumno ngin ai ïa u Remote?”
U Kamal u la ong ba u la rai ban “shim biang ïa u Remote bad buhrieh noh, ” khnang ba “yn ym don mano mano ruh ba pyrshang ban knieh ïa u.” Ka jingïatreilang, u la ong, ka la mih na kane ka daw.
“Lada phi lah ban sngewthuh ïa ka jingïatreilang, kan bha. Lym kumta, to sngap jar,” u la bynrap, da kaba pynskhem ba ki jingeh kum kine ki dei ki bynta jong ka jingtreikam jong ka synshar paidbah. “Lada phim kwah ïa kane, kawei pat ka lad kan long ka jingsynshar donbor, kaba ngim kwah”, u la ong.
Mynta u Kamal u mad ïa ka jingshah kynthoh kaba jur ha ka Online bad na ki nongïaleh pyrshah jong u ha ka saiñ pyrthei, kiba kynnoh ba u pyrshah ïa ka jingïeng pyrshah jong u mynshwa ïa ka DMK.
