Shillong, Naiwieng 20
U Symbud Myntri Rangbah ka Jylla ba khmih ïa ka tnad Pynroi Sor, Bah Sniawbhalang Dhar u la pynbna ba yn sa pynpra noh ïa ka ïingdorbar thawaiñ barim ha Khyndailad na ka bynta ban wanrah bad pyntrei ïa ka projek pynitynnad ha Khyndailad.
Katkum ka jingong jong u, ka jingpynitynnad (beautification) ïa ka Khyndailad kala nang ïaid shakhmat bad yn sa pyntrei pura ïa ka hadien ba dep pynkynriah ïa ka ïingdorbar sha ka jaka ba thymmai ha Mawdiang-diang.
Haba ïakren bad ki nongthoh khubor ha ka sngi Palei, u Bah Sniawbha u la ong, “Phi tip bha ba ïa ka ïingdorbar thawaiñ barim yn dang ban pynkynriah sha ka jaka ba thymmai. Tang mar syn dep pynkynriah sha ka jaka thymmai, ngin sdang shaid-shaid ban pynitynnad ïa kane ka jaka”.
U la bynrap ba ka Detailed Project Report (DPR) kala jan dep, ka ban batai ïa ki jingthmu ban pynpra ïa ka ïing building jong ka ïingdorbar thawaiñ barim bad ban shna noh da ki jaka ïaid kai ki paidbah, ki lynti ïaid kjat, ki jaka thung syntiew bad kiwei-kiwei.
“Ngi la pynkhreh ïa ka DPR bad ka dei kaba itynnad bha. Kumta, lehse ynda la dep lut nadong shadong, yn sa khot noh ïa ka tender. Ïa ka ïingdorbar thawaiñ barim yn sa pynpra noh katkum ka plan, kata ruh ka ban sa ïashim rai, ban shna ïa ki lynti ïaid kjat ba itynnad-baroh ki don lut ha ka DPR”.
Haba ïadei bad ka MTC Shopping Mall, u la pyntip ba ka jingpyndep ïa kane ka jingtei la buh ban long ha u snem ban wan, bad kumba 85-88 % na ki kam kila dep mynta.
“Ka sngi bala buh ban pyndep ka dei ban long ha u snem ban wan. Kyrmen skhem, to ngin ap ïa kane ka sngi bad ynda poi katei ka por ngan sa lah ban ong ïa kiei-kiei baroh,” u la ong.
