Nongstoiñ, Naiwieng 21
Ha ka step Sngi Palei, ki dkhot jong ka Seng Longkmie New Nongstoiñ ha ka jingïadonlang ki nongïalam jong ka shnong New Nongstoiñ ba kynthup ïa u Bah Sraly Rashir, Sordar Shnong, u Bah G. Marbaniang, Secretary, u Rangbah Dong jong ka dong Nondeiñ ki la ïoh ban theh noh ïa ka kyiad na ki spah bilor ha kawei na ki jaka ha ka dong Nondeiñ kaba hap hapoh ka shnong New Nongstoiñ.
La ong ruh ba kitei ki spah bilor ka kyiad kiba la ïoh ban theh ki dei ïa kaba ki dkhot jong ka Seng Longkmie ki la ïoh ban kurup noh na uwei u briew katba u dang thmu ban die be-aiñ ïa katei ka kyiad ha ki bynta jong ka shnong.
U Bah G. Marbaniang, Secretary ka shnong New Nongstoiñ u la ong ba kane ka dei ka sien kaba lai ïa kaba la ïoh ban bat ïa ujuh u briew, bad la sneng la kraw ba ym dei shuh ban ïaleh pyrshah ïa ka shnong.
U Bah Marbaniang u la ong, “Kumban shu pynkynmaw, ka long ba ka shnong ka la thoh ïa ka shithi sha u DC bad ha ka tnad Excise ba balei kine ki ‘Home Delivery’ ki don haduh surok ki kylla nongdie (vendor) na ka bynta ka kyiad, ha ka jingshisha lada ka tnad Excise ka ai jaka ka dei ban ai ha ka jaka jong ka, hynrei ka long pynban ka jingdie lyngkar hapoh surok hapoh shnong bad ka shnong kam don jingtip eiei ïa kane bad kam ju ai jingbit ban die kyiad namar kata ki Seng Longkmie, ki VDP bad Seng Samla ki hap ban kem da ka hukum jong ka shnong.”
Shuh shuh u la ong ruh ba u DC u dei ban ai ka jingpynshai ha kaba ïadei bad kane namar hadien ba ka shnong ka la thoh ïa ka shithi haduh mynta u khlem ong eiei bad khlem ai ka jubab.
U la ong ruh ba katkum ka jingtip ha ka jingshisha ka ‘Home Delivery’ ka dei ban long ha ka jaka jong kaba ki dei ban ai bad kane ka dei tang ha ka por jingwan jong ka jingpang COVID-19 hynrei haduh mynta kam pat kut, kaei ka jingthmu jong ka Sorkar ka tnad Excise.
“Kam lei-lei kata ka jingïaid ka jong ki, kin ïaid katba ki mon hynrei hapoh ka shnong ngim shah ban wan khaïi bad die kyiad be-aiñ lano-lano khamtam ki die hapoh kali, ki die ha ki surok ka la long ka jinglehraiñ,” ong u Bah Marbaniang da kaba u la bynrap ba nangne shakhmat ka shnong kan hap ban leh tyngeh.
U Bah Marbaniang u la ong ruh ba ka shnong ka ai khublei ïa ki Seng Longkmie kiba la ïatrei shitom bad la sdang ïa kane ka kam naduh u snem 2006 haduh mynta 20 snem tam hynrei ki jingsniew ki dang jyllei bad la kyrpad ïa ka Seng Longkmie ba kin sngewbha ban shimkhia ïa kane ka kam nangne shakhmat khnang ban lah ban rat dyngkhong ïa ki jingsniew bad u la kyntu ba kin ym sheptieng namar ka Dorbar Shnong ka don ha syndah ban ïa kyrshan.
